أغبي سؤال في التاريخ_ بقلم: رانيا كمال العربى
أغبي سؤال في التاريخ_ بقلم: رانيا كمال العربى
أنت نمت؟ ها أنت نمت؟ ما ترد؟؟
ما أنا لو نايم هرد ازاي سيادتك ولا أنت أصلا داخل عشان تصحيني !! هو السؤال الصح أنت صاحي؟ فلو الأخ مردش عليك يبقي نايم اكيد يا اما ميت مالهاش حل تاني !!
لكن حضرتك بسؤالك الاولاني أفترضت أن النايم بيتكلم وبيرد وهيقولك: آه أنا نايم من ربع ساعه وبحلم بكابوس إن فيه أسد بيجري ورايا وعايز يعضني حد يصحيني بسرعة أبوس أيديكوا !! أو يرد عليك بكل محبه: أيوة نايم أؤمرني !!
وتاني سؤال مستفز لما تسأل واحد عيان لسه بالع الحباية حالا قدامك وتساله بكل ثقه : ها بقيت أحسن؟
وهو زي الأهبل يرد براحه غريبة: ياه كنا فين وبقينا فين الحمد لله
ياعم إنت هتسرح بينا !! بذمتك لحقت تخف ده أنت لو بتأكل ترمس مش هتلحق تهضمه !!
دواء إيه السحري ده يا خويا اللي لحق يجيب معاك نتيجة!!
أغبي سؤال في التاريخ_ بقلم: رانيا كمال العربى
ولما ترجع من الشغل تلاقي أمك بتقولك إنت جيت يا سامح؟
لا يا حاجه لسه مجيتش !! أصل العربيه عطلت مني وبحاول أوقف تاكسي
ما أنتي حضرتك شايفاني أهو داخل من باب الشقه ولا هو أنا غير مرئي ولاإيه!!
حتي جوجل نزلت مرة أغبي أسئلة بتظهر علي محرك البحث وكانت أسئلة من نوعية:
لماذا تصبح الساعة العاشره بعد التاسعة؟
وهل تطير الدجاجة أم ترقص؟وهل فيه طريقة لنقص الوزن بدون جهد؟ وهل تغير رائحة غازات زوجي دليل خيانته؟ وهل يمكن أكل الهواء في رمضان؟
ده حتي جوجل ياعين أمه بيشوف بلاوي الله يكون في عونه!! دول مش عاتقين حد !!
السؤال الأهبل كمان بتاع الستات الهبلة اللي بييسالوه لأجوازهم لما بيكون ليهم مزاج يتخانقوا !! فتلاقي الزوجه بتقدم لجوزها طبق كريم كراميل و بتحشر المعلقه في بقه وبتساله بكل عشم :
إنت بتحبني ياصلاح؟
وده كمان من الأسئلة الوجوديه اللي محدش لاقي له إجابة لحد الان !!
وطبعا أبو صلاح هيأكد لها ويحلف لها ميت أمين انه ميعرفش ميرفت يمين !! وهيرد علي سؤالها الغبى بسؤال أغبي (هو إنتي تخنتي يا ماهيتاب؟؟)
التعليقات مغلقة.