أحدث أخبار الفن والرياضة والثقافة والمرأة والمجتمع والمشاهير في كل المجالات

زوجه تشكو قسوة زوجها الذي تحول إلى جلاد!!

كتبتها / دعاء خطاب

زوجه تشكو قسوة زوجها الذي تحول إلى جلاد!!

كتبتها دعاء خطاب

المشكله.. 

تقول صاحبتها.. متجوزه من سنة ولسه مفيش أطفال، بيحبنى والحياه كانت جميله بينا.. خروج وفسح وهزار ودلع.. هو حنين وطيب اوي ودمه خفيف وانا بحبه..بشتغل ومرتبي 2500 وجوزي بيقبض 7000.. داخل جمعيه بألفين جنيه.. والف بيساعد بيها أخته علشان جوزها حاله على قده والف لوالدته.. مش بيحط فى البيت غير 3000 بس.. وانا بحط الفين… قبض الجمعية وعايز يغير عربيته علشان قديمه.. بتكلم معاه إن أنت المسؤول عن البيت.. والجمعية دى انا اللي هاخدها.. علشان انا بحط الألفين دول في البيت وده دورك كراجل والمفروض متسمحش لحد يعمله مكانك علشان تحس  انك راجل حتى وكلام زي كده.. بس طريقتي مكنتش كويسه الحقيقه بس انا مقصدش والله اهينه ولا اقل منه خالص

بس الكلام جه كده.. قالى فى البدايه تشكري يا “بنت الاصول” على طريقه كلامك، بس انا اكتر من مره اقولك سيبي الشغل وانتي اللي رافضه، وسهله خالص أدى الفلوس اللي سيادتك دفعتيهم في البيت لحد النهارده.. ودخل جابهم من فلوس الجمعيه.. ومن اللحظة دى متحطيش جنية تانى فى البيت.. وهما اصلا متحطوش فى البيت؛ أغلبهم بترفهى بيهم عن نفسك علشان متصدقيش الكدبه.. البيت يمشي بال3000 كويس من غير جنيه من حد.. اخدت الفلوس ومبقتش احط حاجه بس هو برضه لسه بيحط 3000 بس بيوفر بقي من حاجات زي الخروج.. كنا بنخرج مره فى الاسبوع والمكان اللي اختاره.. مبقاش يخرجنى خالص.. ومبقاش يساعدني فى البيت خالص، بكلمه يقولى ده دورك كست.. والمفروض متسمحش لحد يقوم بيه.. وبعد ما كان أيده بإيدى ..ما بقاش يعمل كوباية شاى لنفسه ولا بقى يراعي انى بشتغل ولازم الأكل فى معاده وطازه ومانع اكل من بره خالص. .من كام يوم اكتشفت خاتم مخبيه فى الدرج بقول له ده جميل اوى انت جايبهولى قالى.. لأ بس لو عوزاه اشتريه هو مقاسك.. بقول  له.. مش هديه يعنى؟

قالى لأ وخده منى وخفاه وانا عارفه ومتاكده أنه كان جايبه ليا بس بيحور لأن تاريخ فاتورته قبل المشكلة.. كلمته نخرج وانا هعزمك قالى يحرم عليا جنيه واحد منك لحد اما اموت.. ده حتى انا بشرب نوع قهوه غالى شويه مبقاش يجيبه وجايب نوع رخيص جدا اشتريته وعملتله قهوه منه معايا داقه ومرضيش يكمل.. وخلانى اعمله تانى من البن بتاعه..ورافض اى حاجه من ناحيتي خالص لو اشتريت اكل من بره من فلوسي مش بياكل منه ويجبرني اعمل اكل فى البيت ولو

منفذتش اي طلب ليه يصدرلى الوش الخشب وانا مش بستحمل عشان عودنى على الكلام الحلو والدلع ومش بستحمل  زعله.. ولو يوم تعبانه مبيراعيش إلا لوغبت من الشغل بيقول مدام قدرتى تروحى الشغل يبقي مش تعبانه بالنسبالى البيت اولى من الشغل مش تخلصي طاقتك هناك وتتعبي هنا.. بكلمه انى غلطانه وحقك عليا ونرجع زي الأول، قالى متجبيش السيره دى تانى ولا تفكريني بيها ومتقصريش فى بيتك ودورك كست وانا هشيلك فى عنيا وياريت تسيبي الشغل ولو مش عايزه.. يبقي ميأثرش على البيت خالص ومتتكلميش تانى فى الموضوع.

مش عارفه اعمل ايه ولا اراضيه ازاى؟؟ 

حياتى اتشقلبت من الحياه اللي طول عمرى نفسي اعيشها.. لحياه ممله كلها شغل بره البيت وجوه البيت!!

الرد على صاحبه المشكله :

اخطأتي حبيبتي وهو كمان.. من حقه يزعل لكن مش من حقه يتمادى بالشكل ده وكأنه بيزهقك، الزواج اصلا موده ورحمه.. فين الزواج في علاقتكم.. اذا اختفت اهم اركانه.. طيب خلاص الزعل اخد وقته وانتي بالفعل حسيتي غلطتك واخدتي درسك واعتذرتي.. وده الغرض من إن الإنسان يقول انا زعلت.. علشان الطرف التاني يراجع نفسه وتصرفاته ويعتذر والطرف الأول يقبل الإعتذار والدنيا تمشي بعدها طبيعي.. لكن عند كل مشكله طرف يجلد التاني حتى الموت ده لا فيه عدل ولا رحمه ولا حد يقر الفعل ده.. وانتي يابنت الحلال.. لازم  تقدري وضعك وظروفكم ومعطيات حياتكم.. من بعد الموقف ده… في حاجات كتير في الدنيا لا يساويها مال ولا اي

شئ تاني مهما كانت أهميته ..في حاجات كانت حلوه بينكم مالهاش مقابل مادي..وزوجك رجل حقيقي يعلم مسؤلياته.. يصل رحمه.. وبار بأسرته بشكل رائع.. وبقدر معاملته الطيبه ليكي والعلاقه الحلوه اللي كانت بينكم.. بقدر زعله وصدمته في كلامك.. لكن معلش الشيطان موجود علشان يفسد علينا علاقاتنا واستقرار حياتنا ويخرجنا من جنه الدنيا ويحرمنا من جنه ونعيم الأخرة.

وكلمه لزوجك..

اعذرها يا أبن الأصول وخد بإيدها وعلمها ازاي تتصرف بحكمه.. أنت كده بقيت عون للشيطان على إفساد حياتكم بتماديك في عقاب زوجتك وخرجت من كونك بتديها درس في الحياه إلى جلاد..

“إِنَّ اللَّهَ يَغْفِرُ الذُّنُوبَ جَمِيعًا ۚ إِنَّهُ هُوَ الْغَفُورُ الرَّحِيمُ”..

فما بالك بحال العبد مع عبد مثله؟!!

لملم بيتك وحن على زوجتك اللي عرفت خطأهاوخليك فعلا رب الأسره القيم عليها مش بس بالانفاق.. ولكن بالإحتواء والنصيحه الطيبه والموده والرحمه لزوجه دي اول أخطائها في حقك فمش معقول  تطردها من آمان حضنك.. لوحده تنهش روحها وتضيعوا من بعض!!

اذا كرهت الدنيا لأجل شخص واحد فقط.. فـ انت كالذي أحرق بيته لـ يتخلص من صرصار” 

  انيس منصور

اللهم أصلح ما بينكم والف بين قلوبكم ☘️

قد يعجبك ايضآ
اترك رد

لن يتم نشر عنوان بريدك الإلكتروني.