أحدث أخبار الفن والرياضة والثقافة والمرأة والمجتمع والمشاهير في كل المجالات

“هيدروكسي كات” (Hydroxycut)

بقلم/ مصطفي عبد العظيم دكتور الصيدلة الاكلينيكية والتغذية العلاجية بولاية نيوجيرسي بالولايات المتحدة الأمريكية

استكمالاً لمقال الأسبوع الماضي عن خطورة استخدام معظم أدوية خسارة الوزن وحوارق الدهون المتاحة في أسواق المكملات الغذائية والصيدليات بدون وصفات طبية، مما يجعل الوصول اليها. سهل نوعاً وبدون رقابه مما يشكل خطر حقيقي علي مستخدمينها. وهو خطر يمكن تفاديه بسهولة إذا تم توضيح مخاطر هذه المنتجات بدون تضليل أو تحيز.
الأسبوع ده هنتكلم عن منتج اسمه “هيدروكسي كات” (Hydroxycut)

ومقال اليوم قد يكون أكثر تفصيلاً من المقال الماضي لكن التاريخ المؤسف للشركة المنتجة كان من الضرورة أن يتم ذكره بالتفصيل.
– تعريفه:
هو ليس بعقار واحد لكنه مجموعة منتجات مختلفة إلي حد ما تحمل نفس الأسم يتم تسويقهم علي أنهم عقاقير تساعد علي خفض الوزن وحرق الدهون.

– تاريخه:
بدايته كانت سنة ٢٠٠٢ عن طريق شركة ماصل تك MuscleTech الكندية اللي أشهرت إفلاسها سنة ٢٠٠٥ وكانت باعت المنتج ده في ٢٠٠٣ لشركة Lovate واللي فضلت تسوقه بأسم الشركة الأولانية.

تم تعديل مكوناته في ٢٠٠٤ وده كان ناتج لإحتوائه علي عقار الإفدرا Ephedra واللي بيحتوي علي العقار المحفز إفدرين Ephedrine واللي تم منع إستخدامه من قبل هيئة الدواء والغذاء الأمريكية FDA عام ٢٠٠٤ لوجود عدة تقارير تثبت وفيات (١٥٥ حالة) وأعراض جانبية خطيرة (حالات صرع وإرتفاع في ضغط الدم وتسارع ضربات القلب) تهدد حياة مستخدمي العقاقير المحتوية علي مادة الإفدرين. غير أن كان الشركة مرفوع عليها حوالي ٨٠ قضية بسبب المنتج ده. وده اللي خلي الشركة تغير تركيبته من ٢٠٠٤.

تم تعديل مكوناته لتاني مرة في ٢٠٠٩ لوجود عدة تقارير تفيد بإحتوائه علي مكونات تضر بالكبد (حمض الهيدروكسي سيتريك أسيد) ووجود عدة تقارير تفيد بأن مستخدمينه أصابهم ضرر مما أدي لأن الـ FDA نصحت مستخدمين العقار بوقف إستخدامه فوراً والشركة أضطرت تسحبه بالكامل من السوق. وأدي أيضاً للمطالبة بوضع قوانين أكثر صرامة علي المكملات الغذائية وأدوية التخسيس.
غير أن برضة في تقارير كتير بتفيد إرتباط إستخدامه بتمزق الخلايا العضلية أو مايسمي بمرض الـ Rhabdomyolysis والذي قد يؤدي في حالات متقدمة لفشل كلوي

من ٢٠١٣ نزل السوق تاني بالمكونات الآتية واللي أعتبرتها الشركة إلي حد ما آمنة وصالحة للإستخدام:
خلاصة الـ Lady Mantle أو عباءة السيدة لو ترجمناها حرفياً
كافيين، خلاصة الزيتون البري، خلاصة الكمون، خلاصة النعناع البري، وبعض الأنواع منه تحتوي علي خلاصة بذرة القهوة الخضراء ويوهامبين وخلاصة بعض أعشاب أخرى.

حتي بعد تعديله في ٢٠١٣ وجدوا أن في تقارير بتشكك في تأثير المكونات الموجودة حالياً فيه علي الصحة من قبل ٢٠١٣ حتي، زي تقرير بيفيد بوجود حالات أصيبت بالإرتجاف الأذيني مرض يصيب أذين القلب Atrial Fibrillation من ٢٠١٠ بسبب مادة موجودة في الشاي الأخضر المستخدم في تصنيع العقار.

وتقرير تاني في ٢٠١٣ أفاد بإصابة مريض بالتهاب القولون التقرحي Ulcerative Colitis بسبب الهيدروكسي كات هاردكور.

من ضمن التضليل بتاع الشركة في تسويقه أنهم كانوا مقدمينه في التليفزيون علي أنه مصنوع ومدعم من طاقم طبي معتمد وكانوا بيقدموا إعلانه مع طبيب مقيم ولما حصلت فضيحة ٢٠٠٩ ودوروا علي الدكتور طلع مالهوش وجود.
وتم فضحهم في ٢٠٠٣ من صحيفة النيويورك تايمز بسبب إخفائهم أدلة تفيد بأن العقار غير مجدي أصلاً وأضراره أكتر بكتير من منافعه.

ويظل التساؤل الأكثر أهمية أن الشركة المنتجة رغم وجود المصادر المادية المتاحة ليه رفضت تجري دراسات جادة وبحوث ميدانية لمدة زمنية طويلة علي عدد حالات مرضية كبير لإختبار العقار قبل تسويقه واللي بيأكد أن الربح كان أهم بكتير من صحة المرضي.

– التأثير والفعالية:

يعتبر هيدروكسي كات ومنتجاته المختلفة متشابهين جداً وأغلبهم مفيش بينهم فرق وبيعتمدوا بالأساس علي الكافيين ومجموعة من الأعشاب.

رغم إن الكافيين معروف بقدرته علي رفع معدلات الأيض (بنسبة ٣-١١٪‏) ورفع معدلات حرق الدهون (بنسبة ١٠-٢٩٪‏) إلا أنه برضة معروف أنه بيكون لفترة قصيرة جداً والجسم بعدها بيرفض يستجيب وبيتعود عليه، واللي بيخليك مضطر ترفع الجرعة لكن في نفس الوقت بتعرض نفسك لخطر الأعراض الجانبية اللي بتأثر علي القلب والأعصاب.

مجموعة الأعشاب لم يتم إختبارها علي البشر بتجارب سريرية محترمة لكن تم إختبارها علي الدواجن والفئران وتم إستخدام جرعة عالية جداً وأثبتت فعالية. لكن تظل الجرعة المستخدمة محل تساؤل غير أن مش كل اللي ينفع للدواجن والفئران هيثبت كفاءة وفعالية للإنسان.
التجربة الوحيدة علي البشر كانت علي مجموعة صغيرة من الناس (حوالي ٥٠ فرد) لمدة قصيرة جداً (١٢ أسبوع) وأثبتت فعالية صحيح لكن أخفت الشركة أي تقارير عن الأعراض الجانبية.
وأي طبيب أو صيدلي أو عالم أشتغل أو درس Clinical Studies هيعرف أن تجربة زي دي أقل ما يقال عنها أنها تضليل ومحاولة من الشركة لخداع المستهلك ، وده دليل الشركة الوحيد لكون العقار Clinically Proven

العقار الأجدد والأكثر تسويقاً Hydroxycut Hardcore مفيش أي دراسات أتعملت عنه بالكامل، إلا أن في دراسات تمت علي مكوناته منفردة في دراسات أخري، وأثبتت فعالية المكونات في زيادة حرق الدهون لكن مش بصورة كبيرة تخلينا نتغاضي عن الأعراض الجانبية الخطيرة.

– الخلاصة:
طيب يعني نستخدمه ولا لأ؟
للأسف مفيش أي دليل قوي يثبت مدي فاعليته، وكتير من الناس اللي أستخدمته كانوا أصلاً ماشيين علي نظام غذائي صحي ورياضة فمحدش منهم يقدر يجزم بأن الهيدروكسي كات كان السبب الأساسي في فقدانه الوزن.. مخاطره كبيرة جداً حتي في أفضل وأامن منتجاته، فبالتالي أنا مانصحش أي حد يستخدمه ولو بتستخدمه أصلاً بطله.. أما لو قمت بشرائه ومستخسر الفلوس فلو حصل ضرر لصحتك بسببه فهتصرف أضعاف تمن الدواء علشان تصلحها.. فعلاً بلاش منه أحسن.
والشركة نفسها علشان تبرأ ساحتها بقت بتكتب علي العلبة ينصح بإستخدامه تحت إشراف طبيب خصوصاً لو كنت تعاني أو أحد أفراد أسرتك يعاني من مرض عضوي.

قد يعجبك ايضآ
اترك رد

لن يتم نشر عنوان بريدك الإلكتروني.