آه من الحموات  

بقلم/ فاطمة طايع

جيتك يا امه ببكي
أنا جايه من بيت جوزي غضبانة
ومن أم جوزي زعلانة
اسمعي وقول مين أنا ولا هي إيلي غلطانة
مالك بس يا بتي
حماتي مش عاجبها العجب
ولا الصيام في رجب
علي طول قارشه ملحتي
وكاسره فرحتي
بغسل وبطبخ وبمسح
وقولت أنام شويه واريح
ألقاها بتطفي عليا المروحة
وبتقول مرات ابني دي واحده مكسحة
طبيخها زي السم
وغسيلها مش نضيف
وأي حاجه منها ما بترضنيش
دي ولا حلوة ولا حاجة
كل يوم تعملي خناقة
وتقولي روحي بيت ابوكي
وما ترجعيش هنطلقوكي
بالذمه يا اامه دا كلام
والله من التعب قولت اريح وانام
هو انا والله ما مقصرة
وبالجوازة دي أنا متحسرة
ردي يا ااامه واحكمي
مين الغلطان انا ولا هي
بصي يا بتي أصبري
وفي شغل البيت اوعي تقصري
أنا أمك وقلبي عليكي
ربنا يحنن قلبها عليكي
اصبري يا بتي دا نصيبك
بكره حقك هيجيلك
بس إوعي تخربي بيتك