الحريم في ديوان كامل ابراهيم

الحريم اتنقبت
.ومعدش منفذ للغزل
ولا عاد هناك وجهة نظر
ولا لون عيون
ولا شعر سايب ع الكتاف
ولا كحل مرسوم ع الجفون
بقى فيه ضجر
ومعدش فيه بنت الجيران
فوق السطوح
واقفه بتنشر شعرها ويا الغسيل
بالقميص أبو فتحه أوسع
من عنيا البصاصين
وأنده عليها بطرف عينها تبصلى
وتقوللى مين ….؟
انا برضه يتقاللى انت مين؟
وانا اتسجنت ف حبها أربع سنين
دنا اللى حامى أرضها
حبت عليا وطلعتهم ف السما
وانا لسه داير ف الشوارع
بستلف حق الطحين
وأنده عليها بطرف عينها تبصلى
تسالنى مين ،،،،؟
وانا لسه ايدى معلمه
ف ايدها اليمين
”””””””””””’
الحريم اتنقبت
ومعدش منفذ للغزل
نكتب ف مين الشعر؟
نكتب ف الوطن؟ ؟
طب ماالوطن لبس النقاب
ودار ه وشه عننا
أخد ف حضنه المحظوظين
واحنا اللى مقلول حظنا
عايزين وطن من غير نقاب
يسمح لسكان الوطن
العيشه فيه بره الغرف
وبره قضبان الحديد
………..
الحريم اتنقبت
وشباب كتير دخلوا السجون
اتظبطت واتوضبت
وفلوس بلدنا اتسربت
لجيوب كتير اتخصخصت
للهبر ولجمع الفلوس
ونفوس بتركب فوق نفوس
وتدوس على راس الغلابة باالجزم
يسقونا ليه العرق سوس .
فيه الشفا
واشرب انا
اشرب مادام الشرب بينسى الشقا
ويتوهك عن رغبتك ف الانشطار
اشرب مادام الفتوى دى
من عمنا مفتى الديار
اشرب ف دور اترخصت
فيها الدعارة باالنهار
اشرب ومتقولش لعدوك
ع اللى كان قاعد معانا ولحظة طار.
طيروه بقرار سياسى وتهمته
راجل عبوس
والحقيقه .إنه مرضيش باالبالوظه
لما جاتله ع الفطار
تمشى برضه ع الفطور
الحريم اتنقبت. واتلخبطط كل الأمور
سكن الأدب ويا السفور
اتوحدت ف بلدنا أسعار المهور
وحريم بتعرف ربنا
وحريم بهزة وسطها
بتدخل الليل ف النهار
متفوقين ف العربده
والصرمحه وشرب الخمور
وحريم يغير منها القمر
وحريم تغور
”””””””””””’
من ديوان ( سx س)
الشاعر… كامل ابراهيم

التعليقات مغلقة.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبول قراءة المزيد