الراجل بيلف لفه وراجع _بقلم: رانيا كمال العربى

 

صديقة ماما اللى كانت دايما تزورنا وانا صغيرة وكنت بحب اقعد معاهم وابص لها بانبهار صرصار بيبص على حتة بسبوسة غرقانه سكر..كنت بحس انها ايقونة الجمال والشياكة وتقريبا كانت بتحط علبة الماكياج كلها على وشها ولا احلى لوحة فنية ل ليوناردو دانفشى .. وكانت دايما تلبس الوان فاقعة وبتلمع زى الفوشيا والبرتقانى والاحمر الصارخ ودايما كانت شنطتها مليانة بونبونى ولبان وادوات ماكياج وبرفان !! ودخلت قعدت معاهم عشان اتفرج على طنط
فغمزت لى ماما عشان اقوم وعملت نفسى مش واخدة بالى وفضلت ابص على اللوحة الفنية اللى فى وش طنط
لحد ما ماما سحبتنى من هدومى ودخلتنى اوضتى بالاكراه..وطبعا كل خمس دقايق اعمل اى حجة واخرج من اوضتى !!
وسمعتها بتشتكى لماما من جوزها انه بيعرف ستات كتير عليها وانها مش بتثق فيه واستغربت ان واحدة مهتمة بنفسها كده وفايقة ورايقة تتعرض للخيانة!!
وخرمت ودنى كلمتها: كلهم عينهم فارغة
ماما: متزعليش دى نزوة وراحت لحالها
طنط: قال بيقول زهق من المانجة و نفسه راحت للطرشى!! ذوقه زى وشه
ماما: ولايهمك كان عايز بس يحدق هيلف يلف ويرجعلك
طنط: ماهو لف ومجاش ..زهق من الطرشى وقال نفسه راحت للكوارع
ماما: معدته هتوجعه ويرجعلك
متخافيش
طنط: خلص الكوارع ودخل على القرع !! تفتكرى هيرجع لى؟
ماما: متقلقيش كان نفسه فى الحلو .. نفسه هتجزع ويرجعلك
طنط: خايفة نفسه تروح للكبسة
ماما: هيجيله حموضه متخافيش وبعدين هو جوزك ده علي لطول جعان يخيبه !!
طنط: يعنى تفتكرى مش هيرجع لى تانى؟؟
ماما: ممكن يرجع فى حالة واحدة
طنط: حالة ايه؟
ماما: فى المشمش ياحبييتى !!

قد يعجبك ايضآ