تحية كاريوكا ورشدي اباظة قصة الزواج والانفصال: بقلم أحمد علي

في لقاء تلفزيوني قديم مع الاعلامية سوزان حسن أذيع علي شاشة القناة الاولي المصرية،كشفت الفنانة تحية كاريوكا عن اللقاء الاول بينها وبين دنجوان السينما المصرية رشدي أباظة وكواليس التعارف بينهم ثم الارتباط والزواج، حيث قالت مكنش فيه اي حاجة تبين اننا هنتجوز او فيه قصة حب ابدا، زملاء اتقابلنا، وهو مكنش معروف وبيتكسف جدا مش زي ما بيتقال عنه، رشدي أباظة كان بيتكسف زي ما الست بتتكسف كان خجول جدا، لما قابلته كان في الربعماية و كانت الاسماعيلية تتبع محافظة الشرقية، قبل ان تكون محافظة مستقلة، وكان الاسماعلوية يتجوزا شراقوة والشراقوة يتجوزا الاسماعلوية،كنا بلديات واصحاب واهل، اهلي كان يعرفوا اهله لكن احنا مكناش نعرف بعض.

رشدي أباظة وتحية كاريوكا ومجموعة من الاصدقاء

علاقة صداقة بين تحية كاريوكا ورشدي اباظة

وأضافت تحية كاريوكا في الوسط الفني اتقابلنا بعدها، وحتي فكرني وقالي انتي ناسية احنا اتقابلنا في الربعماية، قولتلوا ااه فاكرة عايزني اعملك ايه، قعد يضحك وبعد كده بقينا اصحاب يعني اصدقاء، مثلا ييجي يقولولي تعالي نروح السينما اروح مفيش اي حاجة بينا او علاقة حب، لغاية ما في مرة قالي تتجوزيني، قولت له خلينا اصحاب وشيل موضوع الجواز من دماغك خالص، قالي طيب مع الوقت، قولي ااه اشوف افكر قولتله لا مش هقول، وبقينا كل شوية نخرج يقولي تتجوزيني، قولتله وبعدين معاك لغاية، قعدنا تلات سنين اصحاب. 

رشدي أباظة وتحية كاريوكا

تحية كاريوكا وأسباب رفضها الزواج من رشدي أباظة

وخلال اللقاء التلفزيوني كشفت الفنانة تحية كاريوكا سبب رفضها الزواج من رشدي أباظة، فقالت “كنت خايفة، اولا انا كنت ورايا عيلة كبيرة بصرف عليها وقول الله اتجوز وكنت مشغولة في الفن والتمثيل بشتغل اكتر من فيلم في نفس الوقت، وفي مرة رشدي أباظة مع واحدة صحبه وضبوا كمين زواج الجوز، والماذون اللي في الصورة كان مفاجأة ليا، وبعد كتب عقد الزواج نزلنا روحنا سينما، روحنا اتفرجنا علي فيلم ووتر لو بردج في سينما مترو،، وبعدها وصلني بيتنا كنت قاعدة مع ولدتي.

رشدي أباظة يتوسط والدته وتحية كاريوكا

رشدي أباظة يرفض لعب الدور الثاني

واكملت تحية كاريوكا،ستمرينا شهر ع الوضع ده، و اخدنا شقة زي اي اتنين بيكافحوا في بداية حياتهم هو مكنش لسه بيشتغل، وكان بيزهق ويقولى انا هسافر اقوله اصبر وبكرا تبقي كويس، هو طلع في وقت كان فيه نجوم صف اول في السينما المصرية كان فيه فريد الاطرش وعماد حمدي وشكري سرحان واحمد مظهر كانت شلة مرعبة، بس لما جاله الدور المناسب اشتغل ، بس ان رافض يعمل الدور الثاني وكنت بقوله بالعكس لما تعمل دور تاني هيجيلك الدور الأول اشتغل وانتشر وبعدين ابقي نقي، بس هو كان من الاول عايز ينقي وياخد دور البطولة في الافلام. 

تحية كاريوكا ورشدي اباظة

طلاق تحية كاريوكا ورشدي اباظة 

 

والزواج استمر تلات سنوات وضحكت كفاية، وذكرت الصحف في وقتها انه بعد ثلاث سنوات من الشد والجذب انتهت العلاقة بين تحية كاريوكا ورشدي اباظةبالطلاق عندما شاهدت تحية كاريوكا زوجها رشدي أباظة وهو متواجد فى أحد ملاهى شارع الحمراء بلبنان فى وضع غير لائق مع فتاة فرنسية تدعي “آنى بارينه” وعلي الفور قامت تحية بجر الفتاة الفرنسية من شعرها وضربتها بقسوة وطلبت من رشدي الطلاق فى الليلة نفسها.

التعليقات مغلقة.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبول قراءة المزيد