تضحك بنص ضحكة .. والا تموت ؟

كتبت :
ليلى الوشلي
——————

على مسرح الدنيا حاتلاقى كل نوع ….. فصول تراجيدى ، و فصول هزلى و فصول نص نص ،
،شوية تضحك ..
وشوية تعيط ..
بس لما تفهم حاتضحك وانت بتعيط ..

لكن فصول حياتنا مش زى اى فصول . دى فصول بنعيشها بجد.. مش تمثيل
عشناها
ولقينا فصل السعادة قصير ..
والهم فصله طويل
وبعد الهم حكمة ، ودروس ماتتنسيش
بنفهمها كويس ..بس لما بيكون الشعر شاب …

و عملنا إيه بالحكمة اللى اتعلمناها ودفعنا فيها العمر …
الحكمة مالهاش فايدة وإحنا مركونين ع الرف ….
لكن .. ولو يادنيا ..

طول ماهو مسرحك شغال
ولسه لنا فيه كرسى … حانشوف فصولك ،
وحانعيشها ..
و مع ان الضحكة مش م القلب
علشان ضحكنا كتير ..
ومع إن الحزن مابقتش الدموع تفضحه ،
علشان عرفنا ازاى نداريه..
لكن…
ولو ..
طول مالنا فيك كرسى
مش حانتركن ع الرف
دنيتى بمزاجى
===========

ليلى الوشلي

التعليقات مغلقة.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبول قراءة المزيد