” جمله قالتها ساميه جمال وغنتها أم كلثوم!!”
” جمله قالتها ساميه جمال وغنتها أم كلثوم!!”
” حب إيه اللي انت جاي تقول عليه !!”
جملة قالتها الفنانه الإستعراضيه (سامية جمال) للملحن الصاعد بقوه وقتها (بليغ حمدي) لما راح يعترف لها بحبه!
انزعج بليغ اوي من الرد، وراح يفضفض للشاعر (عبدالوهاب محمد) وحكي له اللي حصل، وقاله دي قالت لي حب ايه
اللي انت جاي تقول عليه!
ولأن طبيعة أي شاعر إن وقع الكلام العادي عليه بيكون مختلف وبيلتقط الكلمات المميزه في اي حديث او لفظ عابر، وبيركز جدا في الجُمل التي قد تبدو عاديه في اي حوار؛ التفت عبدالوهاب محمد للجملة وعجبه التعبير ووجد انه ينفع مطلع أغنية، فواسي بليغ وقاله (يلا معلش)، وبدأ في كتابة مطلع أغنية (حب إيه).
وبعدها عرض الأغنية على (السيده أم كلثوم )اللي بدورها سجلت إعجابها بالكلمات واتصلت بالفنان (محمد فوزي) وعرضت عليه تلحينها، وبالفعل وافق وبدأ في العمل عليها.
وفي أحد الأيام كان بليغ متواجد بالصدفه عند محمد فوزي في بيته، وفوزي ساب بليغ قاعد في الصالون ودخل يعمل إتصال تليفوني، بليغ لقى ورقة علي الترابيزة مكتوب فيها كلمات أغنية” حب ايه!” أٌعجب بليغ بالكلمات وامسك عوده وبدأ في تلحينها مع نفسه، دخل عليه فوزي وقال له ايه ده انت لحنتها أحسن مني!!
توجه محمد فوزي في وقتها للسيده أم كلثوم مصطحب بليغ معاه، وعرفها عليه وهو متحمس له جدا وقالها؛ ده ملحن جديد بس عبقري ولحن الأغنية أحسن مني، وبكل
سماحه وبساطه يتنازل فوزي عن حلمه القديم ( التلحين لسيدة الغناء العربي ) للملحن الشاب بليغ حمدي، وكانت دي بداية التعارف والتعاون الفني بينهم والذي اثمر عن روائع فيما بعد.
ويحدث ان تشدو بها أم كلثوم وتحقق نجاحاً كبيراُ والأغنية تكسر الدنيا وتبدأ رحلة طويلة من النجاحات مع الست والتي وصل عددها إلى 11 لحنًا، وهى:
“حب إيه، حكم علينا الهوى، ألف ليلة وليلة، الحب كله، إنا فدائيون، فات الميعاد، بعيد عنك حياتي عذاب، كل ليلة
وكل يوم، سيرة الحب، أنساك، ظلمنا الحب”.
وعلي غير المألوف بعد كم النجاحات التي حققها تعاونهم سويا؛ فقد رفض بليغ تلحين أغنية “هسيبك للزمن “، رغم
سعى الجميع للتلحين لكوكب الشرق، وفى لقاء تلفزيونى للموسيقار الكبير ( بليغ حمدى) كشف أنه رفض تلحين
أغنية “هسيبك للزمن” ، موضحا أن صديقه الشاعر عبد الوهاب محمد عرض عليه تلحينها ولكنه بعد ما قرأ كلماتها
وجد فيها شئ من قسوة على الحبيب قائلا علي حد تعبيره وقتها: ” إزاى حبيب يقدر يقول لحبيبه هسيبك للزمن، إبكى مش هسأل عليك اشكى مش هرحم عينيك..أنا مقدرش أقول كدة لحبيبى مهما حصل!
الحب حنية مش قسوة وعلشان كده رفضت تلحين الأغنية لأنى مش مقتنع بكلامها..وبالفعل لحن الموسيقار الكبير
( رياض السنباطى) هذه الأغنية بدلاً من بليغ حمدى.
