جُبران…. بقلم.. كامل بدرخان

جُــبــران   

بقلم/ كامل بدرخان

مش هجبرك على شِيء
وأجبرك ليه
مَن شَبَّ على شيء
شاب عليه
وليه ألجأ معاك على الجُبران؟!
وأرسم قلب وسهم على الجُدران
وأدوق معاك السِم في الحرمان
واكسر بخاطري واتركني لو ناوي ع الهِجران
ربك بيرزق الّلي في البحر والحيتان
دا ربنا جبار وجبره جبران
جبر الرزق الّلي يجرِّي الريق
يبقى إنت مش رزقي ولا شيء
وجبر في كل الأمور
يبقى مش محتاجين نلِف بقى وندور
أمّا عن طقوس الهوى والنذور
فاعتبر إنه انتهى كل شيء
روح يا شيخ وإعتبر عِبرة
واذرف الدمع عَبرة ورا عَبرة
وسيبني أصارع موج حبك العالي
ودوَّامات بعض عِشقك الباقي
وأعوم وأهيم في عشَّك الغالي
ودوس على راسي
واكتم أنفاسي
وفي ماءك المالح غرَّقني
وشرَّبني ملحك وشرَّقني
وبعد ما كنت أنا بلسمك
ترميني في بحرك ياكلني السمك
في بحرك العميق
واسلم إنت وخلِّيني لوحدي غريق
غرَّقني في بحرك وخلِّي موجك فوق
يمكن يهدى كدا بالك وتنسى حبنا وتروق
أنا قادر أنساك بكاسة شاي
بس إصبر عليَّا شوي
وعايزني بعد كل دا أعوز منك شِيء !!!
يكونش عندك ألماس ودهب وعقيق !!!
قد يعجبك ايضآ