حكاية مقاتل مع صلاته منصور عبدالسلام

قد تأتيك رسائل ربانية من الله عز وجل في لحظة تكون فيها حائر بين اليأس والرجاء …. في لحظة تشعر فيها أنك منهك القوى … وأن قلبك لم يعد يحتمل ولا السن ولا الصحة لأي متاعب من أي نوع
قد تصل مع يأسك وتعبك للتقاعس عن حق الله عليك في الفروض فتؤديها بشكل آلي لاروح فيها ولا خشوع
وفجأة
تأتيك رسالة من الله
منشور على صفحة موقع التواصل الاجتماعي الفيسبوك لشاب لم يبلغ الثلاثين من العمر
وقد أهداه الله المرض ليجعله بإذن الله في ميزان حسناته
ليكتب كلمات مست قلوب كثيرة و احبني منهم
حقا
من ذاق عرف …ومن عرف اغترف
إقرأوا معي ماكتبه
—-
منصور عبدالسلام
أنقل كلماته كما كتبها تماما في منشوره علها توقظ قلوبا غافلة عن الله عندما ترى شابا في عمر الزهور يندم علىصلاةلم يخشع فيها برغم أنه أداها …وغيره كثيرين ممن تكاسلوا أصلا عنها
إدعوا معي له بالشفاء
وإليكم الرسالة
—————–
من اربع سنين كنت صلاتى متقطعة وسريعة جدا لدرجة انى كنت لما اسجد المس الارض واقوم على طول ،طبعا كنت غلط بس كنت النفيسة مرتاحة على الاقل بصلى

لكن اصبت بسرطان رئة وكبد وحاجات كتير كده مش هتعب دمغكم بيها ومن ضمن الأمراض مياة على الرئة بسببها كنت كل ما اسجد الصديد يخرج من فمى وافضل اكح واحسن انى روحى بتطلع وافتكرت الايه دى

(يوم يكشف عن ساق ويدعون إلى السجود فلا يستطيعون 42 خاشعة أبصارهم ترهقهم ذلة وقد كانوا يدعون إلى السجود وهم سالمون ( 43 )

طبعا كنت بصلى بس وانا على كرسى وكنت معتقد انى هموت من شدة التعب الى كنت فيه وحزين على صلاتى الى ضيعتها وانا بصحتى
ومره وانا فى المستشفى دخل عليا واحد صاحبي مش بيصلى وشفنى فى مرضى ومركب انابيب فى جسمى و بصلى بيها فقالى ”انت فى عز مرضك وفاكر ربنا وانا بصحتى ومش بصلى وربنا هداه من يوميها

وفرحت جدا بس كان نفسى اسجد زى الاول عشان اعوض الى ضاع منى وخصوصا انى عشت اربع سنين مش بعرف اسجد لله بسبب الصديد والى قبل كده مكنش استمتاع بالصلاه ” بنفذ امر خوف من ربنا وخلاص وان الى مش بيصلى كافر ”

المهم انى كنت فاقد الامل ان الصديد ده يتوقف وربنا انعم عليا وتوقف من اسبوعين تقريبا ولما عملت اشاعة من كام يوم مكنش باين صديد خالص وقلت ارجع اجرب اسجد تانى

والحمد لله سجدت من غير تعب او كحه او خوف
ولاول مره فى حياتى احس الاحس ده بجد ومكنتش عايز اقوم من السجده وتمنيت لو ان الله يقبض روحى وانا فى السجده دى

طبعا ده فضل ونعمه من ربنا عليا الحمد لله بس انا بكتب الموضوع ده ليه ؟؟

كتير من الناس والشباب عمال يقول هصلى لما اكبر، وفى مش بيفكر فى الصلاه خالص ،بس نصيحة مش هقولك ان الموت ميعرفش سن ولا ان ممكن يجيلك مرض يمنعك من السجود فى الدنيا قبل الاخره لا

لما هتصلى هتكون بتتصل بربنا كل يوم 5مرات وانت مش محتاج حاجة ويوم ما هتحتاج هتخبط على بابه ومش هتتكسف ولا تستحى عشان عملت الى عليك مع ان ربنا رحيم بس لازم نستحى
زى ما تكون كده عايز حاجة من حد ومش بتسال عليه غير لما بتحتاج له شكلك هيكون عامل ازاى ؟؟

هقولك ان احساسك يوم القيامة وانت عملت الى عليك ومستنى رحمة ربنا احسن بكتير لما تكون مستنى النتيجة وكتابك فاضي!!

لما تصلى حالتك النفسية هترتاح بدل ما انت بتسمع الاذان وبتحاول تهرب او تخترع اعزار ومش عايز تسمع

وختاما أسأل الله لي ولكم الهداية والخشوع فى الصلاه
واسالكم الدعاء ان اموت وانا ساجد بين يدى الله