حوار/ أحمد حبشي : لم تتأخر نجوميتي .. والنجم مصطفى شعبان نعم الأخ والصديق

حوار/ مي إسماعيل محمد

“الحياه مليئة بالحجارة فلا تتعثر بها ، بل اجمعها و ابن بها سلماً تصعد به نحو النجاح” هذه المقوله الشهيره للزعيم مارتن لوثر كينج التى تنطبق كل كلمه على الشخصيه التى نحاورها اليوم ونغوص فى اعماق عقله ..

اعداد وحوار/ مي إسماعيل محمد مساعد رئيس تحرير موقع المشاهير
اعداد وحوار/ مي إسماعيل محمد
مساعد رئيس تحرير موقع المشاهير

انه فنان ذات موهبه كبيره مر بمحطات كثيره واثبت انه يمتلك موهبه كبيره بعد ان خلع عباءة الكوميديان واخرج من جعبته موهبته التى اشاد بها كل من رأه على شاشات التلفاز انه الفنان أحمد حبشي فهيا بنا نتقرب منه اكثر ونتعرف عليه عن قرب ..

15

– فى البداية اتقدم لك بكل تحيه وتقدير ونحب ان نتعرف عليك عن قرب فحدثنا عنك باستفاضه ؟

– أنا اسمي أحمد حبشي .. بحب التمثيل جداً .. من وانا صغيركنت بمثل فى المدرسه وقصور الثقافه بس عُمري ماحلمت ان ابقى ممثل فى الحقيقه .. لما كان حد بيسألني انت عايز تطلع إيه؟ كنت بقول ظابط زي اي طفل فى السن ده .. لحد ماعرفت ان فى معهد الفنون المسرحيه ماكنتش اعرف عنه او اسمع عنه فقدمت فى المعهد وكنت اول الدفعه فى التقديم .. بعد مادخلت المعهد اتعرفت على دكتور أشرف زكي كان وقتها لسه مُعيد .. وبعد ماتعرفت عليه كان بيخرج مسرحيه وقتها اسمها “ملاعيب” بطولة النجم ماجد المصري أل هفضل مادين له بالولاء له ولأستاذ أشرف زكي ومُعِد المسرحيه صديقي الفنان خميس عزالعرب الشاعر الجامد قوى أل مش واخد حقه الحقيقه .. تحولت من احدا الكومبارسات ال موجودين بالمسرحيه لأحدا ابطال المسرحيه وكانت البدايه والحمدلله كانت بدايه قويه يمكن بعد كده عديت بمحطات كتير فى حياتي مش على نفس المستوى وده له اسباب كتير جداً من اهمها اني معملتش عمل قوي معملتش حاجه تتناسب مع ال انا اقدر اقدمه .. بعد كده ابتدت محطات كتير في حياتي .. تصنيف كوميديان فضل ملازمني كتير جداً وهو تصنيف ضيق قوي .. نجم نجوم مصر ونجم نجوم العرب الأستاذ الزعيم عادل إمام قدر بذكائه بجانب موهبته الغير محدوده يظل على القمه لأكتر من 40عام قدر بذكائه يخلع بدلة الكوميديان بسرعهوهو فى عز ماكان مكسر الدنيا فى “شعبان تحت الصفر”و”رمضان فوق البركان” وأفلام كلها جميله لكنها افلام كوميدي قدر يعمل فيلم بجودة “حتى لايطير الدخان”قدر يهرب من العباءه الضيقه قوي هي عباية الكوميديان .. نجحت بس بعد فتره طويله جداً واثبت نفسي اني بعرف امثل وبحب التمثيل واني بعرف اعمل اي حاجه تانيه غير الكوميدي واتمنى اني اعرف اعمل حاجه كويسه غير الكوميدي .. لحين اني بعتبر “أيوب” المحطه الأساسيه فى حياتي هي المحطه ال تم بعدها التحول من فكرة انك كوميديان وبس والبدله الضيقه دي لأنك لا انت ممثل لو دور كوميدي هضحك لو دور شرير الناس هتتفاعل معاك لو دور طيب الناس هتحبك لحد الحمدلله وصلت لجزء من النجاح والناس بقة فى الشارع تناديني بأسمي فى المسلسل “يابريزه .. يابريزه”ويقولو الازمه بتاعتي ..

– أنت برج إيه ؟

أنا برج الأسد .. وأعتقد اني بحمل صفات كتير من اصحاب هذا البرج زي مابيقولو كل المقربين مني .. مش هقدر اقول ان انا طيب بس الحمدلله شويه جدع وشويه طيب .. عندي صفات كتير موجوده فى برج الأسد وبحب برجي قوي وبعتز بيه على فكره.

900x450_uploads,2019,05,25,6757c7cebf

– كلمنا عن ابرز المحطات فى حياتك ؟

ابرز محطات حياتي .. أول محطه هي مسرحية “ملاعيب” بطولة النجم ماجد المصري واخراج دكتور اشرف زكي دي ال ابتديت اتعرف فيها على الوسط الفني مش على الجمهور لأن الحقيقه المسرحيه ماتذاعتش بشكل واسع على النطاق الجماهيري لكن قدرت من خلالها اعمل قاعده جوه الوسط عرفوا ان فى ممثل هنا وكوميديان اسمه أحمد حبشي .. اعتبر ان المحطه التانيه بعد فتره طويله جدا من الملاعيب هي “أيوب” بطولة النجم الصديق الجدع الراجل مصطفى شعبان واخراج المبدع أحمد صالح أل عرفوا يخرجوا أفضل ماعندي والحمدلله كانت نقله حقيقيه فى حياتي  .. والمحطه ال احنا فيها دلوقتي محطه مسلسل “أبوجبل” الحمدلله رب العالمين تفاعل الناس مع الشخصيه الحمدلله الحمدلله تفاعل بالنسبالي مُرضي على الاقل لان الناس متفاعله مع المسلسل وحبهم لشخصية شعبان وامنيتهم الشخصيه ان شعبان مايطلعش هو القاتل لأنهم حبو شخصية شعبان وشافوا فيه الصاحب الجدع الجميل ده اعتقد الحمدلله رب العالمين نجاح .. بالأضافه ان شخصية شعبان فيها جزء درامي حلو قوي عملوا المؤلف ببراعه محمد سيد بشير هو شعبان ال سرق وله مش هو شعبان ال سرق وده كان الهدف بتاعي ان اخلي الناس طول الوقت عندهم شك هو وله مش هو فالحمدلله رب العالمين قدرت اعمل ده وحتى الان الناس هو شعبان وله مش شعبان مع امنيتهم الشخصيه ان مايكونش شعبان لان الناس دلوقتي بتحب الشخص الجدع الطيب ال هما مفتقدينه فشيفينوا فى شخصية شعبان .

59659016_417095455746510_8345151091402342400_n

– مالدور الذي قمت به وكان الاقرب لقلبك وتعتز به ؟

كل الأدوار ولادي .. كل الأدوار ال عملتها بحبهم زي ولادي فعمرك ماهتقدري تميزي طفل عن التاني كلوا ابنك .. لكن احيانً بيبقى فى حاجات انت بتعمليها وانت مطره او لانك عندك توازنات تانيه عندك التزامات تانيه انتي مرتبطه بيها داخل الحياه .. انا اب ورب اسره وعندي التزامات حياتيه فاحيانً بتعملي حاجات وانتي مطره تعمليها .. بس برضوا فكرة التمثيل نفسها انت بتشتغل شغلانه انت بتحبها بتعمل موهبتك فلازم تبقى مستمتع زيك زي لاعيب الكوره لو لاعيب الكوره مش مابسوط فى الملعب عُمره ما هيأدي والممثل لو هو مش مبسوط قدام الكاميره عمرك ماهتاخدي منه الشغل ال انتي عايزاه .

2019_5_16_15_9_20_131

– مسلسل “أبوجبل” من المسلسلات التي لاقت نجاح كبير وخصوصاً شخصسة شعبان .. حدثنا كيف استعديت لهذا الدور؟

 هو استعداد زيوا زي اي شخصيه فى الدنيا بتئري كويس قوي .. انتي مش بتئري الورق بس انتي بتئري بين السطور وبتقعد مع المخرج وبتسألوا انت عايز ايه من الشخصيه دي ؟ وايه الرساله ال عايز توصلها عن طريق شخصية شعبان ؟ وبتسألوا لو مش فاهم حاجات .. فالقرأه هنا بين السطور فى حوار شعبان ثم بتيجي بعد كده بتيجي الأضافه الفنيه ال انت بضفها من عندك عن طريق موهبتك وعن طريق استعابك وهيا الحيره ال حاطط فيها الناس ده كان الهدف بنسبالي ان نفسي اعملوا والحمدلله قدرت اوصولوا .

606

– عملت مع الفنان مصطفى شعبان عدت اعمال ناجحه حدثنا عن شكل العمل معه والكواليس ؟

مصطفى شعبان من اهم المحطات فى حياتي .. مصطفى شعبان اجدع صديق ممكن تقابلوا فى حياتك صديق على مستوى الفعل صديق على مستوى القول صديق على مستوى الموقف نجم بكل ماتحمله الكلمه من معنى عارف يعني ايه انه نجم الفريق لازم يلم كل الناس حواليه لازم يشجع ويقول كلام حلو يحمس كل الفريق بيه ينشر الابتسامه دايما فى اللوكيشن اد ايه حريص انو كل الناس تهتم بتفاصيلها .. اد ايه حريص ان كل شخصيه تاخد حقها حتى على مستوى الكتابه لانه شايف ان العمل الفني هو عمل جماعي لازم عشان ينجح لازم كل العناصر تنجح فيه .. مصطفى شعبان لو قعدت اتكلم عنه من هنا لحد السنه الجايه مش هيكفي .. مصطفى شعبان احد ال وقفوا فى ضهري وساندني دايما كنت بستفيد من نصايحوا جوه اللوكيشن عن رؤيته وازاي يقدر يوصلك المعلومه بدون مايحسسك انه بيقولك معلومه او انه بيقول رأيه انا رايي كده انت ايه رايك ؟ فلما تشتغل مع نجم بقيمة وقامة مصطفى شعبان لازم تتعلم منه لازم تستفيد منه لانه اكيد ماوصلش لحب الناس وال هو فيه ده من شويه فانا ازاي استفيد من خبرة مصطفى شعبان .. ازاي استفيد من نجومية مصطفى شعبان من القاعده العريضه ال بتقعد تتفرج عليه كل سنه فالحمدلله رب العالمين على مستوى الصداقه شهادتي فيه مجروحه لانه اقرب الاصدقاء ليا ال انا بحبهم واتمنى اننا نفضل صحاب وانشاءالله هنفضل صحاب طول العمر ويجي يوم كده اوفيلوا جزء من جمايله وايمانه بموهبتي ومسعدتي اني اوصل موهبتي للناس .. وانا بحبه جداً وهفضل احبه.

 – هل ترى ان الاهتمام بك فنيا وابراز مواهبك الفنيه جاء متأخرا ؟

تأخير اكتشاف موهبتي انا مش شايف كده اولا كل شئ بإيد الله عزوجل لكن يمكن كنت مأثر فى حق نفسي فى فتره من الفترات يمكن ماكنتش شغال عليها كويس يمكن ماكونتش بهتم بشغلي زي ماانا مهتم بيه دلوقتي يمكن ماحلفنيش الحظ .. مره زمان سألت النجم الأستاذ حبيب قلبي الله يرحموا الفنان سامي العدل قولتلوا هيا النجوميه دي الواحد يروحلها ازاي ؟ رد عليا رد بسيط قوي قالي النجوميه ماحدش بيروحلها النجوميه هيا ال بتجيلك لحد عندك .. اه طبعا كان حلمي اول مابدأت ان ابقى نجم بسرعه لكن اكيد هي بتيجي وقت ما ربنا رايد وده مش على احمد حبشي وبس عندنا امثله كتير جدا نجوم اتأخرت نجوميتهم بس لما باقو نجوم اثبتوا انهم نجوم حقيقيين يستحقوا المكانه ال وصلولها زي أحمد فتحي زي بيومي فؤاد زي محمد سعد زي النجم الأستاذ الأب النجم حسن حسني ناس كتير جداً نجوميتهم اتأخرت لكن لما جت فضلوا على الساحه الفنيه فتره طويله قوي من الزمن ربنا يزيدهم ويفضلوا موجودين ويفضلوا يمتعونا باعمالهم .. فكل ما الحاجه تيجي متأخر قوي كل مابتعرفي قيمتها قوي فبتحافظي عليها قوي قوي وتستمتعي بشغلتك قوي .

 60209344_418702495585806_5560164507059224576_n

 – اعطي رسالتين واحده لفريق عمل مسلسل ابوجبل والثانية لمحبينك ومتابعينك ؟

اقول لفريق “ابوجبل” كلوا اشكركم جداً جداً لانكم كلكم اهم عناصر نجاح اي عمل من اول عامل البوفيه لحد احمد صالح ومصطفى شعبان احسنتم كلكم كلاً فى موقعه كل واحد اجاد شغلتوا وابدع فيها لحد ال خرج العمل بالصوره الحلوه دي عشان نلاقي الحمدلله رب العالمين النجاح الجميل ده كلكم نجاحتم وكلنا نجحنا عشان كل واحد ادى شغلوا بالشكل المظبوط وكلنا كنا بنحب بعض لاننا كنا مجموعه بتحب بعض راحت تعمل حاجه بتحبها .. واقول لمتابعيني وللناس ال بعد ربنا سبحانه وتعالى عايش بفضلهم انتم مش اسباب النجاح انتو النجاح من غيركم أحنا ولا حاجه من غيركم مافيش معنى للفن مافيش مقاييس انتوا مقياس النجاح فى اي حاجه لما بتتقدملكم حاجه محترمه بتحترم عقولكم بتحترموها وبتحترموا ال بيقدمها وبتقدروه لما حد بيستخف بعقولكم اعتقد بترفضوه بسرعه ومابتستوعبوش ال هو بيقولوا .. اتمنى ان اكون دايما عند حسن ظنكم واتمنى ان دايما اقدملكم حاجه تحترمكم وتحترم عقولكم .

 53806413_387083465414376_3494633834408837120_n

 – واخيرا حدثنا عن تطلعاتك ؟

يعني تطلعاتي الحمدلله رب العالمين تطلعات لا حدود لها انا الحلم الاكبر بنسبالي هو الحصول على جايزة الاوسكار ازاي معرفش لكن ده اكبر حلم بنسبالي .. لكن فى الاحلام ال برضوا بحلمها اني يبقى عندي رساله دايما ان اكون بحترم عقول المتفرجين مااقدملهمش فن يستخف بعقولهم او اقدم حاجه ماحبش نفسي فيها بعد كده اتمنى ان دايما اكون عند حسن ظنهم وان استغل موهبتي ال ربنا وهبهالي اني اسعدهم دايماً .

وختاما لقد تشرفت بعمل هذا الحوار الشيق متنيه بمزيد التألق والاستمراريه ..

والى اللقاء اعزائي القراء مع شخصيه جيده متميزة فى مجالها

مع حبي مي اسماعيل

التعليقات مغلقة.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبول قراءة المزيد