أحدث أخبار الفن والرياضة والثقافة والمرأة والمجتمع والمشاهير في كل المجالات

شروق العقدة أمي بطلة حياتي

شروق العقدة أمي بطلة حياتي

كتبت… نسرين يسري

 

الشعور بالحب من ناحيه الأبناء غريزة بداخلهم
عندما نكتب عن الاهل والاحباب القلم يعجز عن التعبير عن ما بداخلنا من مشاعر وأحاسيس وهنا شروق العقدة تكتب رسالة حب وشكر واحترام في عيد الام لاغلى انسانه لها وهي والدتها ومن جمال التعبير والصدق في المشاعر ان تتحدث شروق العقدة وتقول امي بطلة حياتي…

مضمون الرسالة سوف ينشر كما أرسلته لي لأن كل حرف معبر عن ما بداخلها من حب. 

أمي بطلة حياتي…

ماما اتجوزت وهي عندها ١٦ سنة وزواجها ممنعهاش انها تكمل تعليمها بالعكس كانت حابة كدة انها تكمل وتدخل جامعة واللي ساعدها علي تحقيق حلمها كان أبي رحمة الله عليه كان بيجبلها مدرسين خصوصين في البيت وده ساعتها كان غريب مش حاجة عادية زي دلوقتي بابا ساعدها عشان شاف فيها اصرارها انها تكمل حاجة هي بدأتها
ماما اتخرجت من ثانوية عامة ونجحت في مدرسة لم ينجح فيها احد ودخلت كلية اداب قسم لغة عربية وديه كلية صعبة كدة بل تكاد تكون مستحيلة انا حقيقي مقدرش اني أحفظ الف بيت شعر واكتر حقيقي كليه صعبة جدا جدا بس اصرارها وبمساعدة بابا بردو قدرت انها تنجح وبتقدير وتكمل للاخر مع العلم انها كان معاها اطفال بس كانت بتدي كل حاجة حقها
اكيد هتقولوا دلوقتي لنفسكم عشان كان معاها راجل بيساعدها فا قدرت توصل اكيد ده كان ليه عامل مهم بس الاهم منه اصرارها في حياتها انها تكمل حاجة بدأتها ده العامل الاهم
اتخرجت ماما واشتغلت مدرسة لغة عربية بعديها نجحت اكتر واكتر ماشاء الله وبقت موجهة اولي لغة عربية وفضلت مكملة في نجاحاتها لغاية ما بقت وكيلة وزارة بس انجاز ماما مكنش في دراستها و شغلها وبس لا في معاملتها معانا وتربيتها وحنيتها اللي كانت موجودة علي طول مهما كانت تعبانة ومشغولة الا ان كانت حنيتها هي السحابة اللي مضللة علينا في حياتنا
اه صحيح انا اخر العنقود يعني معشتش ده كله بس من حكاوي بابًا عن ماما وانا صغيرة حسيت اني كنت عايشة معاهم بالظبط
امي بطلة حياتي فعليا عارفين ليه كمان وكمان عشان بابا توفي وانا في ٣ اعدادي واول ما توفي ماما قدمت علي معاش مبكر عشان اقدر تربيني وتخلي بالها مني مع انها كان من الممكن انها تسيبني مع اخواتي لكن ماما كانت مقدرة جدا جدا ان كل اخواتي متزوجين وكل واحد ليه بيته واسرته مرضيتش تتقل عليهم وفي نفس الوقت حبت ان يكون كل وقتها يكون ليا انا وبس محرمنتيش من حاجة ولا من نادي وتدريبات رياضية ولا دروس ثانوية عامة ومصاريفها ولا كلية حلوة واهم حاجة محرمتنيش من حنيتها عليا
ماما عمرها ما حبت تدلع نفسها زي اي ست تانية كانت مفضلاني ومفضلة اخواتي حتي الان علي نفسها في عيد ميلادها وعيد الام تتصل علينا واحد واحد وتقولنا
“اياكوا تصرفوا فلوس في هدايا انا عندي كل حاجة انا اللي اجبلكم مش انتوا ” حبيبتي انتي يا امي. حتي في مناسبات ليكي مش عايزة حاجة مننا ده ميمنعش اكيد اننا بنحتفل بيها ومعاها بس فعلا كانت بترفض الهدايا وتخلينا نرجعها بالعافية وتقول “بيتك وعيالك اولي ”
او تقولي ” انتي وزوجك اولي اتفسحوا وسافروا انتو لسة شباب وعرسان جداد ”
أمي بطلة حياتي وحبيبة قلبي كل عيد ام وانتي بخير وانتي معايا ، ربنا يديكي طولة العمر يا رب ، ربنا يحميكي ويحافظ عليكي ويطول في عمرك يا حبيبتي
وختمت رسالتها………
كل سنة وانتي طيبة يا ماما فهيمة الشربيني
من ابنتك المحبة
شروق العقدة

قد يعجبك ايضآ
اترك رد

لن يتم نشر عنوان بريدك الإلكتروني.