” قلوبهم بيوت فاتحين شبابيكها” بقلم نرمين الزيات

الإحساس بالآلم 

محدش اكيد بيحب يتألم، بالعكس كلنا بنحاول نبعد عن مصدر الآلم وخصوصًا الألم النفسي..لأنه للاسف وجعه صعب اوي ومؤلم ..بيحطك كده في الخلاط.. بيبقي فيه اعراض جسديه.. وأعراض نفسيه..تلاقيك تعبان مش قادر ..زهقان.. فاقد الرغبه.. مش عاوز تكلم حد ومش
عاوز تسمع من حد.. بتبقي حاله
ملخبطه ..احساس فقدان القيمه واني مستحقش..اكتر كلمه او شكوي بتوصل الاحساس بالألم واللي تخلي الانسان عاوز يسيب كل حاجه  ويمشي..لما الواحد بيبقي خلاص رصيده من الطاقه صفر، كل ما الضغوط بتكتر بنحس بالعجز، واقفين في مكانا مش عارفين نتحرك
ساعاتها بنحس ان جسمنا بيتقل وبيزيد الاحساس بالألم..احساس ان الدنيا كلها بتتحرك وانت واقف مكانك.. بيخلي دماغك تبقي زحمه وخناقه كبيره جواك… ياااااه
هيا الصوره بتبقي غامقه اوي كده؟!
آه.. انا مارضيتش اقول اكتر ..علشان
الكلام كله وجع.. ليه بنوصل للحاله دي..او بمعني ادق ليه الحاله بتوصل للعمق ده والتقل ده؟!

لأن ببساطه شديده

تراكمات الحياه من تربيه.. على  علاقات غلط، خبرات وخبطات وكل ده بيعدي علينا واحنا ساكتين ولما نتخنق شويه نروح.. نعمل ايه مثلا؟ نشتغل زياده يمكن الشغل يتوهنا!!
ناكل زياده يمكن الاكل ينسينا!!
نشتري كتير كتير ..يمكن نتبسط!!
ونلاقي نفسنا شغل كتير بضغوط أكتر.. اكل كتير وزياده وزن؛ فنزعل على صورتنا وشكلنا في المرايه..لبس كتير.. وشراء كتير وحاجات مركونه انبساطها في لحظتها؛ فالعطلان يزيد.. ونخش في”ديلما” ونجيب اللي فات ..اللي من بعيد اوي.. وكأننا كنا نسيناه وافتكرناه دلوقتي.. لكن الحقيقه كان موجود طول الوقت وهو اللي كنا طول الوقت بنخبيه
او بنعمل اللي يتوهنا عنه.. الكلام اللي ياما اتقال ..انت ماتستاهلش انت ماتستحقش..انت مش كفايه مقارنات كتير … خذلان من ناس ياما وقفت جنبها وكل ده وجسمنا عمال يشيل ويحمل..بس للأسف  مالوش ميزان يتقاله الحموله خلاص زادت عن الحد؛ فيقع..ينهار..يتألم ويجري اللي حواليه.. يقولوا اعمل علاقات جديده.. اخرج.. اعمل اي حاجه
تخرجك من اللي أنت فيه..توهمك إنك احسن، وهنا الجسم بيبقي القرار مش بإيده.. فبيقع.. كل اللي بوصفه ده ..حاله ورا حاله ورا حاله، ناس تعبانه وموجوعه ياريت اللي يلاقي حد متغير …بقي غريب في تصرفاته، حاسس انه بقي مش هو، ميسكتش اهم حاجه يوصله رساله إنه مهم
إن وجوده مهم.. يوصله انه يفرق مع
ناس كتير بتحبه… حتي لو هو كان بيفرق معاه اللي بيحبهم.. خد بإيديه  ساعده إنه يطلب مساعده.. وياسلام لو عرفتوا تقربوا من بدري شويه؛ هنهون علي بعض كتير.. ياسلام لو نمارس الإنسانيه في ابسط صورها، إننا نحس ان اللي بيوصف وجعه،
بتاعه هو..هو اللي يقدر يقول
بيوجعه قد ايه …ماتفّهش من تعبه ولا تسفهه من خوفه وقلقه…هو اللي شايفه وحاسه مش انت.. يا سلام لو نمارس إنسانيتنا بأبسط صورها..إننا مانتريقش ولا نقلل من إحتياجاته حتي لو كانت إحتياجاته حضن ولا كلمه حلوه ولا ضحكه في وشه ولا حتي طبطبه على كتفه… بسيطه صح .. اهو علي قد بساطتها.. على قد ما في اللي بيبخل على اقرب الناس له بيها.. اوعوا انتوا كمان
تبقوا كده.. اصل نفوس الناس هشه
وضعيفه وقلوبهم بيوت وفاتحين
شبابيكها… خليكوا النور اللي يخلي اللي يشوفه يصدق إنه مهما الليل كان طويل هتيجي شمس بكره، خليكوا الحب اللي يشوفوا يصدق ان ممكن يتحب.. وليه لأ ..ماهو حقه حتي ولو اتحرم منه، خليكوا الأمان للي يحسه او يجري عليه.. علشان
يطمن اصله طول عمره كان مهزوز،
خليكوا الانسان اللي لو شافه غيره يقول يااااه ده الدنيا لسه بخير.