“محتاجه اشوف حقبل بالوضع ده ولا لأ!!” ٥٥ مشكلة حب

* محتاجه اشوف حقبل بالوضع ده ولا لأ !

نقلتها لكم/دعاء خطاب

– وضع إيه يا يسر؟؟!

* الوضع اللي إحنا فيه ده، طول الوقت محتاجين نشرح نفسنا، ومش بس للغرب؛ ده كمان للناس اللي حوالينا، مبقاش كفايه في الزمن ده إننا نقول بنحب بعض، حتي سحر الكلمه دي؛ بطل عند الناس مبقاش له مفعول!

– ناس مين؟؟
إحنا بعد مانتجوز علي فكره حنقفل بابنا علي نفسنا ولا حنسمع حد ولا لينا دعوه بحد..

* هادي..ارجوك كفايه، كفايه تحاول تقنعني وتطمني، أنا فكرت كتير اوي في الكلام ده، حتي لو انا حقدر استحمل دلوقتي فأنا بكره مش حقدر استحمل كلام الناس..

– حنسيب الناس اللي احنا منعرفهمش دول يبقوا سبب رئيسي إنك تاخدي قرار تكملي معايا ولا لأ..مش كده ؟!

*علشان انا عايزه اعيش في سلام، انا مبسوطه بحياتي كده وبكل اللي حصلي، إصابتي وعجزي علي فكره نعمه كبيره اوي من ربنا، لكن حياتنا مع بعض دي مش حتبقي في سلام حتي لو حاولنا..

– انتي فعلا عايزانا نسيب بعض؟
إحنا نقدر نفرح ونتجاهل كل شئ سلبي يا يسر..

* ارجوك قدر كلامي وافهمه، خلينا نعيش كده ونرضي بالواقع.

– أنا عارف اني حاولت كتير، وضغطت عليكي أكتر وحاسس إني لو حاولت أكتر من كده حكون بأذيكي..يمكن أنتي صح وانا غلط!

* معلش.. الدنيا مش بتدي كل حاجه للأسف، بس انا عايزه اشكرك ..انت ادتني حاجات كتير اوي حلوه، ادتني ثقه في نفسي .. خلتني اتأكد إني شخص بيعرف يحب اوي وينفع يتحب، أنا عمري ما حنساك.

#بعد_عامين..

– كان صعب عليا اضغط عليها أكتر من كده.. كان لازم احترم رغبتها وإرادتها، بس كمان انا مش بيأس وفضلت وراها لغاية ما اتجوزتها وبقي عندنا احلي بنوته..وبقيت اسعد راجل في الدنيا..

* انا اللي سعيده وفخوره وفرحانه بيك وبنفسي..فرحانه إني مستسلمتش، ومسبتش نفسي اتهزم..صحيح ربنا بعتلي الشخص اللي يساعدني..بس كمان علشان قدرت اكون إيجابيه، وأدور علي احلام جديده ..ويمكن ده اللي خلاني لسه قادره ألفت نظر راجل زي هادي، وبكره ان شاء الله فركش تصوير اول افلامي ..من بطولة هادي نصار.

– فاتت سنين ولسه ضحكتها أكتر حاجه بتملأ قلبي فرحه، ضحكه حفضل دايماً بحافظ عليها مهما حصل..

* السعاده قرار.. وانا قررت اعيش دايماً سعيده أياً كانت الظروف..
بحبك.. بحبك

(هو إن في الواقع؛ الرضا والقبول والصبر علي البلاء والإجتهاد بيساعد إنه يفتح الباب ..وتعلمنا ان احنا منحكمش من البدايات لكن نحكم بالخواتيم، وشوفنا إن من وراء الحرمان الظاهر؛ بيكون في عطاء خفي من الله سبحانه وتعالي وعوض كبيرررر للحمادين والشاكرين والمكافحين ..وربنا بيقول :
“وَعَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ ۖ وَعَسَىٰ أَن تُحِبُّوا شَيْئًا وَهُوَ شَرٌّ لَّكُمْ ۗ وَاللَّهُ يَعْلَمُ وَأَنتُمْ لَا تَعْلَمُونَ ” صدق الله العظيم ) دكتور/ مصطفي محمود

#55_مشكلة_حب
#دكتور_مصطفي_محمود
#عيشها_بفرحه

نقلتها لكم/ دعاء خطاب