أحدث أخبار الفن والرياضة والثقافة والمرأة والمجتمع والمشاهير في كل المجالات

محمد فوزى الحاضر الغائب .. أسرار من حياته وكيف تنبأ بموته

يعد الموسيقار الكبير محمد فوزى واحدا من أهم الموسيقيين في تاريخ الموسيقي العربية .
ويعد من الفنانين الذين تنبأوا برحيلهم عن دنيانا وذلك قبل ساعات من وفاته.كتب وصيتة وطلب أن يشاهد ابناءة .

بقلم / رحاب يوسف

أسرار فى حياة فوزى

  * نشاة الفنان محمد فوزي:

محمد فوزى حبس عبد العال الحو اتولد 19 اغسطس سنه 1918 في قريه كفر ابو جندي مركز قطور الغربيه وكان والده مقتدر ماديا وعنده عزبه  160 فدان تزوج والده ثلاث مرات وعنده 25 ولد وبنت وكان ترتيب فوزي وسط اخواته هو رقم 21 وكانت والدته هي الزوجه الثالثه وانجبت خمس اطفال كلهم اسماء مركبه منهم جمالات بهيجه اللي هي الفنانه الجميله هدى سلطان.

* النشأة الفنية للفنان محمد فوزى:

ورث محمد فوزي عن والده حلاوه الصوت وقرر انه يسافر للقاهره لدراسه الفن ولكن والده رفض تماما ولكن فوزي اصر على السفر للقاهره وبالفعل سافر فوزي للقاهره ولم يكن يمتلك اي مبالغ ماليه وكانت والدته ترسل له حواله شهريه بقيمه جنيه واحد فقط ولكن دون معرفه والده.

  * بداية محمد فوزي الفنية:

في بدايات الفنيه شاف ايام صعبه وعاش المرار ثم اشتغل في فرقه بديعه مصابني وكان بياخد في الشهر 7 جنيه وتعرف فى الفرقة على تحية كاريوكا وإسماعيل بس ومحمد عبد المطلب لانهم كانوا اعضاء معاة فى فرقة بديعة مصابنى.ثم اشتغل فى فرقة فاطمه رشدى ,وبعدها فى الفرقة القومية.

* زوجات محمد فوزي:

سنه 1943 اتجوز محمد فوزي اول جوازه له وهي من السيده هدايه عبد المحسن واشتغل فوزي في فتره جوازه من هدايه حوالي 26 فيلم ده غير تلحين الاغاني خلفوا ثلاث اولاد هم سمير ونبيل ومنير .

وفي يوم فاجئ محمد فوزي زوجته السيده هدايه انه عايز يتجوز من الفنانه مديحه يسري لكنها رفضت بشده واصرت على الطلاق وتطلقوا فعلا سنه 1951.

واتجوز محمد فوزي مديحه يسري في نفس السنه وخلفوا بنتهم وفاء لكنها اتوفت بعد ولادتها مباشره وبعدها خلفوا ابنهم عمرو واللي بعد كده بقى بطل مصر في الكاراتيه.

ولكنه توفى سنه 1982 في حادثه بشعه عاش محمد فوزي مع مديحه يسري ثمان سنين في سعاده وهنا وفجاه طلبت مديحه يسري الطلاق من محمد فوزي لكنها رفضت تقول السبب الحقيقي للطلاق وتم الطلاق بينهم سنه 1959.

ولكنهم فضلوا اصدقاء حتى بعد الطلاق لانهم كانوا زوجين وكانوا شركاء في الاملاك سنه 1961 اتجوز محمد فوزي من زوجته الثالثه والاخيره الفنانه كريمه او فاتنه المعادي ولما الفنان محمد فوزي خيرها ما بينه وما بين الفن اختارت محمد فوزي لانها كانت بتحبه وكملت معاه حياته حتى نهايتها.

* شركة مصر فون محمد فوزي وشركاه:

  سنه 1957 قرر محمد فوزي انه يعمل شركه لطباعه الاغاني على الاسطوانات في مصر بدل من الطباعه بره لتوفير العمله الصعبة .

باع محمد فوزي نصيبه في تركه والده وباع كثير من املاكه ورهن فيلته وكانت شريكته من الباطن الفنانه مديحه يسري التي وضعت كل ثروتها معاه وشاركه جارهم المليونير السعودي حسن سرور الصبان واسسوا شركه مصر فون محمد فوزي وشركاه وكان راس مال الشركه 20000 جنيه.

ثم بعد ذلك قرر فوزي التوسع في النشاط وعمل مصنع الشرقي للاسطوانات وجهزوا باحدث الاجهزه والمعدات سنه 1959 دخلت شركه فيليبس شريك مع فوزي بدل من شريكه السعودي الصبان وكانت شركه فوزي بتقدم منتج ممتاز وباسعار رخيصه وللسبب ده اتعاقد مع الشركه فنانين كتير منهم كوكب الشرق ام كلثوم واللي كانت صديقه مقربه جدا من محمد فوزي.

* قرار التأميم:

وفجاه سنه 1961 صدر قرار التاميم للشركات الاجنبيه في مصر وطبعا شركه فيلبس اجنبيه اللي كانت شريك لمحمد فوزي في شركته بدل من الشريك السعودي وفي يوم دخل فوزي شركته وجد شخص قاعد مكانه وبيفتح في مكتبه وقال له بكل قسوه احنا اممنا شركتك روح على مكتبك الجديد والمكتب كان جنب الجراج وامام غرفه الساعي طبعا المفاجأة والصدمة على محمد فوزي كانت صعبه رجع فوزي البيت ودخل على زوجته كريمة وقال لها احنا انتهينا يا كريمه اخذوا كل حاجه وثروتنا راحت وانت دلوقتي حره في اختيارك اما تكملي معايا او ننفصل لكنها اختارته للمره الثانيه. 

* مرض محمد فوزي:

دخل فوزي في حاله اكتئاب بعد ما خسر كل حاجه شركته وفلوسه وده اثر على حالته الصحيه وفضل وزنه يقل بشكل كبير جدا وبدا يحس بالم شديد في رجله وبعد كده انتشرت الالام في جسمه كله وللاسف ما حدش كان عارف يشخص حالته لحد ما نصحوه بالسفر لانجلترا جمع فوزي شويه الفلوس اللي معاه وسافر وبرده هناك ما عرفوش عنده ايه ورجع ثاني على مصر وبعد ما رجع انتكست حالته اكثر وكان لازم يسافر تاني.

لكنه المره دي مش معاه فلوس للسفر قررت الفنانه تحيه كاريوكا صديقته انها تجيب له قرار للعلاج على نفقه الدوله ولكنهم رفضوا رفض قاطع وبدون ابداء اي اسباب او مبررات وبمساعده اخته هدى سلطان وجوزها فريد شوقي سافر محمد فوزي لندن ومنها لالمانيا ولكنهم فشلوا في تشخيص حالته وكل اللي عملوه انهم عيشوه على المسكنات القويه ورجع محمد فوزي مصر.

وبعد كده قررت كوكب الشرق انها تجيب لمحمد فوزي قرار بالعلاج على نفقه الدوله ولكن بنسبه 50% بس وبدون مرافق وسافر محمد فوزي هو وزوجته لكن على حسابها لانجلترا.

* سبب فقدان محمد فوزى ل وزنة 

وبسبب المرض فقط محمد فوزي اكثر من 50 كيلو من وزنه وفي الوقت ده كان محمد فوزي مفلس تماما قرر في الوقت ده الفنان فريد الاطرش انه يتكفل بعلاج محمد فوزي لكن لما كوكب الشرق عرفت راحت على طول على مكتب جمال عبد الناصر وقدرت انها تجيب قرار من جمال عبد الناصر نفسه لعلاج محمد فوزي على نفقه الدوله ولكن بعد فوات الاوان.

* وفاة محمد فوزي:

 ساءت حاله محمد فوزي جدا لان المرض مش معروف كان عنده سرطان العظام اللي اتنقل بعد كده للنخاع الشوكي ورجع محمد فوزي مصر في حاله صعبه جدا وكان عايش على المسكنات وفجاه دخل في غيبوبه وفي يوم 20 اكتوبر سنه 1966 فاق محمد فوزي من الغيبوبه وطلب من كريمه مراته انه يشوف اولاده وكتب وصيته وقال لها انا هموت النهارده يا كريمه بس ادفنوني بكره بعد صلاه الجمعه وطلعوا الجنازه بتاعتي من ميدان التحرير.

*جنازة محمد فوزي:

ومات محمد فوزي وهو عنده 48 سنه وخرجت الجنازه من ميدان التحرير يوم 21 اكتوبر سنه 1966 وتحملت اخته الفنانه هدى سلطان وام كلثوم وجمعيه المؤلفين والملحنين مصاريف الجنازه وحضر الجنازه كل فنانين مصر ورحل عن عالمنا المبدع محمد فوزي بعد معاناه مع المرض والقهر…..

قد يعجبك ايضآ
اترك رد

لن يتم نشر عنوان بريدك الإلكتروني.