مصممة أزياء مصرية تطلع للعالميةاسم براند ديمه كوتور

مصممة أزياء مصرية تطلع للعالمية باسم براند ديمه كوتور

أزياء جميلة تقدمها مصممة الأزياء المصرية التي  تشق طريقها نحو العالمية إنها  ميادة علوي التي تظهر التصاميم ببساطة وجمال، ولا تغيب عنها التأثيرات العربية و الغربية وتبحر في عالم الأزياء بتصمميات رائعة وجذابة في فستان الزفاف والسوارية.

  • كيف تعرف ميادة علوي عن نفسها؟

 ميادة علوي حاصلة علي بكالوريوس تجارة من جامعة قناة السويس مقيمة في محافظة الاسماعيلية.

  • متى بدأتي العمل كمصممة أزياء ؟

بدأت المهنة كمصممة أزياء لما كنت في خمسة إبتدائي، كنت احب الجلوس على ماكينة الخياطة الخاصة بجدتي ، وفى الاعدادية بدأت اعمل ملابس ليا ولأخواتي والأقراب، وفى مرحلة الثانوية بدأت اعمل علي نفسي واطور منها للأحسن ، وبعد ما تخرجت من الجامعة، تزوجت وزوجي كان يدعمني وساعدني في فتح اتيلية خاص بيا، ومن هنا كان انطلاقي في عالم الموضة.

ديمه كوتور
ديمه كوتور
  • ما هو مصدر الهامك؟

مصدر الهامي هى الالوان ، فهي تشعرني بالتفاؤل وتحفزني لاتخيل هدفي بشكل واضح ، ولان مصممة الأزياء لازم تكون موهبه ولازم تكون شايفة الشغل ده بنظرة مختلفة مش مجرد انه بيجب فلوس لا طبعا انا شايفه حاجة بحبها جدا وبطور فيها واشوف افضل مايكون ولانه هو مصدر إلهامي، وانا بلبس اي عروسة من جسمها واختيارها  لاستايل معين، والفكرة اللي العروسة بتقولها ليا بتكون مصدر إلهام ليا وتنور عيوني علي استايل جديد في الاختيارات المختلفة لفستان الزفاف أو الخطوبة،

وكل جديد بيطلع ليا شغل جديد أكون متميزة فيه، والحمدالله في كل مرة بتفوق على نفسي واكون مختلفة عن اي مصممة أزياء.

  • كيف تتميز ميادة علوي عن غيرها؟

اولا التميز شيء مهم في حياة كل مصممة أزياء ، عشان مش ينفع اقلد فكرة ، ولو حتى قبلتنى فكرة لازم اطور واغير فيها وممكن تكون مصدر الهام مثلا ، وممكن بعد ما تطوري فيها وتبقي جميلة تبهر الناس وحتى ممكن تبهر صاحب الفكرة الاصلي .

  • هل تلقيتي الدعم؟

طبعا تلقيت الدعم المعنوي من أمي وجدتي وأخواتي واصدقائي والعائلة وكل الناس المحبه ليا وتتمني ليا الخير، وزوجي طبعا كان ليه الدعم المعنوي والمادي عشان هو كان ليا سند ودائما بيشجعني ووقف في ظهري وساعدني في عملى.

  • من ينافس ميادة علوي في تصميمات الزفاف ؟

مافي حد بينافسني ، انا بشتغل على نفسي واطورها واطلع افضل ما عندي من موديلات من تفكيري الخاص ، وطبعا مابحبيش اقلد اي حد أو انافس اي مصمم أزياء اخرى، وانا ماشيه على مبدأ ان بعد عن المشاكل واريح دماغي من  حوارات  الناس ، بالعكس احب ان اشتغل لوحدي، فتبدأ الناس هى اللي تشوف شغلى وتدور عليا وتعرف كويس أن شغلي مختلف عن اي مصمم ازياء تاني.

  • ما هي موضة الفترة القادمة؟

بصراحة أنا مش مقنعة بموضوع الموضة، بس انا ممكن اعمل تصميم يكون من خلالي أنا موضه. يعني اعمل موديل جديد الناس هي اللي تقلدة فيكون موضة، شكله حلو ولطيف يحبه الناس ويكون في حدود المعقول، عشان لو عملنا حاجة خارج عن الطبيعة ماتعجبيش كل الناس ، في مبدأ بيقول خير الأمور الواسط، فلازم افكر بعقول الناس واعمل حاجة تعجبهم.

  • كلمينا عن مهرجان حجابي ؟

مهرجان حجابي بالنسبالي نقطة تحول طبعا في حياتي ، و بالمناسبة حابه أشكر الدكتور/ مي مرغني لانها هى سبب ترشحي في المهرجان وتشرفت بمعرفتها ، ومبسوطة جدا بالتعامل معاها ومع كل فريق عمل المهرجان من أعدد وتنسيق ومصممين الأزياء غيري والميكاب أرتيست، لكل الدعم للمهرجان ، وكل حاجة في المهرجان حلوه وجديدة وعمل متميز ومختلف وان شاء الله يستمر في السنوات المقبلة، وكل في المهرجان مجتهدين وحابين يطور من نفسهم وروح التعاون ماخليني حابه نفسي معاهم ومع الدكتور/ مي المرغني جدا، ولان مهرجان حجابي مهرجان مختلف وجديد علينا لأن طول عمرنا عارفين ان ملكة جمال العالم أو مصر بتكون غير محجبة، فأول مرة في مصر تكون في ميس إيجيبت محجبه ، فطبعا حاجة تشرفنا وجميلة وفي منتهى الرقي.

  • وهل سبق لكي الاشتراك في مسابقات خاصة بالحجاب ؟

بصراحة اشتراكت في مهرجانات كتير، لكن أول مرة اشترك في مهرجان للمحجبات ، وانا مبسوطة اني هشترك فيه لانه جديد عليا ومختلف واكيد هيكون فارق معايا جدا وان شاء الله هيكسر الدنيا.

  • ما الأقمشة والألوان المفضلة؟

مافي قماش مفضل أو لون مفضل عندي ، القماش مجرد ما يكون قدامي اي ما كان بيطلع  من أي بلد ويتوجد قصادي ، الفكرة بتيجي على طول ، بإختلاف اللون ، التطريز ،والشكل ونوع القماشة، أى ما كان لأن مصمم الأزياء بيكون ليه نظرة وتكنيك معين ، بأنه مجرد ما يمسك القماشة هيعرف يعمل بها ايه بالظبط.

  • ايه موضه الوان في فستان زفاف ٢٠٢١؟

طبعا فستان الزفاف معروف باللون الابيض حتى لو درجات الابيض تطورت للاغمق  أو الافتح ، هيفضل طول عمرة هو فستان العروسة ومتصدر في العالم كله حنى لو في بلاد بتلبس الفستان أحمر أو روز بس الابيض  هو الاساسي حتى هنا في مصر هو معروف فستان العروسة ابيض .

  • أخيرا ما مشاريع ميادة علوي مستقبلا؟

مشاريع مستقبلا إن شاء الله ! في مشاريع كثيرة بفكر فيها ، افتح فروع تانية باسم البراند الخاص با وهو( ديمه كوتور)، وبالفعل فتحت 3 فروع في محافظتي الاسماعيلية ، واللي جاي باذن الله فرع هيكون في القاهرة، وبعد كده بفكر اطور في مجالى واشتغل فيه يعني مثلا تصنيع القماش والتطريزوالتصدير بره مصر ،مع اني اشتغلت كذا حاجة بره مصر ، ان شاء الله هيكون على نطاق اوسع.

وانا شايفة نفسي كــ ميادة علوي حاجة كبيرة جدا في المستقبل بإذن الله ، نفسي يكون عندي مجموعة مصانع ، مجموعة  شركات ، ده حلمي بجد وبطلبها من ربنا وعمري ما طلبت حاجة من ربنا وتاخر عليها فيها ، جميل جدا انك تحلم وتحقق حلمك وخصوصا لما يكون قلبك نقي وصافي وكله حب وتفاؤل ومحبه للناس ، وبمحبه الناس شايفة نفسي حاجة كبيرة ومهمه، حلو قوي ان الناس كلها تفرح بشخص، ويبقي ناجح ويشرف بلده في بلاد تانية، ويرفع اسم مصر الغالية .

احساس جميل بالنجاح وان الناس تكون فرحانه بيك ويحبه ويتصوروا معاك ، وبالفعل ده بيحصل معايا حاليا في محافظتي الإسماعيلية ، وبيديني دعم وتفاؤل وطاقة إيجابية مالها حدود، واأنا أعمل جاهدة على ايصال اسم برند   

 ( ديمه كوتور ) إلى العالم وتحديداً الى قلوب السيدات.

 

  

 

قد يعجبك ايضآ