مكملات الأناقة ” هكذا يصبح مظهرك عنوانك”

مكملات الأناقة ” هكذا يصبح مظهرك عنوانك”

كتبت : داليا حسام 

ستايلست ومنسقه مظهر

متابعه لسلسله مقالتنا اللى تهم كل بنات حواء هيكون كلامنا النهارده
عن مكملات الاناقه
هى ايه مكملات الاناقه ؟

هى كل حاجه بنكمل بيها شكلنا الخارجى زى
_الشنطه
_الشوز
_الاسكارف
_الحزام
الاكسسورار

مكملات الاناقه بشوفها اهم من الطقم اللى بتختاريه
بمعنى انتى ممكن تختارى لبس بسيط جدا وشكله يكمل بعقد وشنطه وشوز ويبقى يجنن

آزاى ؟

هضربلك مثال
مثلا عندك مناسبه ومعندكيش حاجه ليها ملحقتيش تظبطى حاجه ليها
خلى دايما عندك فى دولابك طقم فورمال
جاكت وبنطلون او چيب سك لونهم اسود او كحلى وبلوزه ستان او دانتيل
الطقم ده يكون فى دولابك اساسى
مجرد ما بتحطى عليه عقد لولى او الماظ او كريستال وبتلبسى شوز وشنطه مناسبين تبقى عملتى طقم سواريه ينفع فى حاجات كتير
و بسيط ومش مكلف
ويناسب اى جسم رفيع او مليان
وبيكون شكله فى منتهى الشياكه

اهتمى دايما يكون عندك كذه سكارف يليق على معظم لبسك
الاسكارف بيدى شياكه للبسك وكمان بيدارى جزء كبير من مساحه الصدر اذا كان جسمك مليان

الكوليه اللى بتختاريه ركزى فى المتريل بتاعه مش كل متريل ينفع فى كل وقت
كمان حجم جسمك يعنى اذا مليانه البسى حاجات طويله بلاش الكوليه العريض اللى بيملى الصدر لانه بيشد العين ويلفت النظر لمنطقه ممكن تكون من ديفوهات جسمك

الشنطه اللى بتستخدمها مهمه الشنط الجلد بتناسب اليوم كله
بس الشنط القماش والخوص والقش
بتنفع للنادى والمصيف والخروجات الصباحيه
اذا جسمك مليان ابعدى عن الشنطه الكروس لانها بتبقى شكلها مش متناسق مع حجم جسمك وبتبين انك ضخمه عليها
واذا كنتى رفيعه ابعدى عن الشنط الضخمه لانها برضو مش بتكون متناسقه مع حجم جسمك

الشوز :
اذا كانت رجلك رفيعه ابعدى عن الهاف بوت على الفستان القصير لانه بيبين رفع رجلك وبيبقى شكله مش لطيف
البسيه على بنطلون افضل

واذا رجلك كانت مليانه برضو ابعدى عن الهاف بوت على الفستان او الچيب القصيره لانه بتبين ان رجلك مليانه بشكل ملفت

الحزام :

اذا كنتى مليانه اوعى تلبسى حزام مباشر على وسطك البسى حزام يكون ساقط تحت وسطك ويكون فوق بلوزه شيفون مثلا او بونشو
علشان تدارى اى ديفو فى منطقه الوسط والصدر

واذا كنتى رفيعه الحزام على وسطك بيبن رفعك ابعدى عن منطقه الوسط علشان متبينيش ده
تسقيط الحزام بيتفادى ظهور الديفوهات فى المنطقه ديه

اهتمى بمكملات الاناقه لانها بتفرق كتير جدا فى شكلك النهائى وبتدى مظهرك شياكه
وخليكم دايما فاكرين اننا كل ما نكون ابسط كل ما نكون اشيك

قد يعجبك ايضآ