اتجوزى الراجل اللى يخليكى ٦٠ كيلو_ بقلم : رانيا كمال العربى

فى جروب الاكل الهيلثى والرجيم ..اتبرع واحد من اعضاء الجروب المبجلين وقدم نصيحه لكل الستات اللى فشلوا فى الدايت وانهاروا امام اول طبق كشرى بالدقه!!
وكتب لهم ” بدل ماتتعبى نفسك فى الدايت اتجوزى الراجل اللى ياخدك ٨٥ كيلو ويخليكى ٦٠ كيلو”
طيب ماتختصرها وتكتب “اتجوزى اللى ياخدك لحم ويرميكى عضم” تقولوش هتتجوز دكتور تخسيس؟؟
ولا قصدك تقول ان الراجل النكدى بيسد النفس يعنى!!
طب اذا كان كده يبقى زى الفل يعنى هتجوزيه عشان يحرق دمك ويحرق دهونك واهو تبقى ضربتى عصفورين بحجر وعملتى رجيم بدون مجهود ده غير الرياضه اللى هتعمليها من جريك فى محاكم الاسره وانتى شايله العيال على كتفك ورايحه جايه زى اللى بيرفعوا اثقال بالضبط!! ..يعنى رجيم ورياضه و رفع اثقال.. يبقى مش ناقصك حاجه عشان تخسى وملكيش اى حجه ولامبرر الا بقى لو متجوزه واحد فرفوش ودمه خفيف لا سمح الله وفاتح نفسك عالاكل والحياه لدرجة ان وزنك وصل معاه ل٩٠ كيلو!!
عرفتوا بقى فوايد الزوج النكدى😁😁