أحدث أخبار الفن والرياضة والثقافة والمرأة والمجتمع والمشاهير في كل المجالات

الحب وصاجة الشوى

CTD8720202329

الحب وصاجة الشوى

 

بقلم… عادل حراز

اللى اخترع صاجة الشوى ده عبقرى فعلا 
صاجة الشوى هى الطبقه العازله بين النار والحاجه اللى فوقيها سواء كانت حله او اكل زى السمك مثلا ..
وقد استعملت جدادتنا وامهاتنا صاجة الشوى في كل أمور الطبخ علشان الاكل يستوى على نار هاديه وزى ما بيقول المثل علشان الرز ما يشطش . ووضع الصاجه في توقيت معين على البابور او حتى البوتاجاز فن لا يعرفه الا الخبيرات في المطبخ ودايما يقولك بعد الرز مايتشرب حطى يابنت الصاجه علشان يطلع مفلفل..
ولو كان طبيخ تقولك علشان الاكل يطلع مسبك وله نكهه وطعم مختلف .
فن التوقيت ده ــ هو هو نفسه ــ فن المسافه بينك وبين الاخرين.!
وكما تقول الرائعه احلام مستغانمى الحب هو : فن المسافه !
وتحديد فن المسافه دى موهبه ..مش اى حد يعرفها لانها بتتقاس بالاحساس وعلشان كده كانت الناس زمان بالها رايق ونسبة الخلافات بينهم قليله لانهم بيعرفوا يقيسوا باحساسهم الصادق فن المسافه بينهم وبين الاخرين .
امتى يستعملوا صاجة الشوى في علاقاتهم ببعض وامتى يهدوا النار أيا كانت النار سواء كانت نار الحب او نار الشوق او نار البابور او البوتاجاز علشان كده عمر مشاعرهم ما كانت بتتحرق .
لان اخطر انواع الحروق واصعبها علاجيا هو حرق المشاعر !!

ومنين بيجيى حرق المشاعر ؟؟

بيجى علشان حضرتك معملتش حساب لا للمسافه ولا لصاجة الشوى فرحت جدا بالعلاقه بينك وبين الاخر سواء كان ذكرا او انثى وسيبت النار والعه على اخرها من الاول مستعجل علي طبخة الحب او طبخة الصداقه علشان تستوى بسرعه وفجأة تلاقى مشاعرك اتحرقت في غمضة عين لان درجة الغليان بتبقى عاليه جدا نتيجة ارتفاع درجة حرارة الاندفاع العاطفى من طرف او من كلا الطرفين ..ولو فكرت حضرتك تهدى نار الاندفاع شويه او حطيت صاجة الشوى حتلاقى كل الامور تمشى علي مايرام .
صاجة الشوى في العلاقات مهمه جدا ..
امتى تقرب وامتى تبعد ..امتى تعلى النار وامتى تهديها.
المسأله دى عايزه عقل يجيد التعامل مع عود الكبريت الاولانى .
وعايزه قلب يحس بالنار زى اللى ماسكها 
وعايزه عيون تشوف الفرق بين النار الزرقاء والنار الصفراء والنار الصافيه الهاديه زى نار الفحم لما يهدى .
دائما وابدا فكر في صاجة الشوى في علاقاتك مع الاخرين علشان مشاعرك ما تتحرقش فجأة.
ودائما تذكر ان اعظم انواع الحكم والفلسفه بتخرج من افواه المجانين !
ماتحاولش تستعمل في مشاعرك الحله التيفال لانها مع الوقت برضه بتبوظ

الصاجه هى الحل !

عادل حراز

من كتابى على طبلية الحاجه

قريبا بالاسواق 

قد يعجبك ايضآ
اترك رد

لن يتم نشر عنوان بريدك الإلكتروني.