السيرة الهلاليه وذكريات المسلسلات من ذاكرة رمضان

ابو زيد الهلالى

كتبت / غادة العليمى

مسلسل السيرة الهلالية اتعمل منه 3 اجزاء.. كل جزء ببطل مختلف.. وكواليس من المشكلات لا يعرفها الكثيرين

فى الجزء الأول كان البطل أحمد عبد العزيز..

الجزء التاني جمال عبد الناصر..

الجزء التالت رياض الخولي..

ومالا يعرفه البعض ان الدور تم عرضه على  أحمد زكي لكنه اعتذر عن المسلسل لانه كان مشغول بالسينما.. زى ما اعتذر على مسلسل البر الغربي ..

وهو في تاريخه كله مسلسلات معدودة زي الايام ومسلسل “هو وهي”، ويبدو ان احمد ذكى كان لا يفضل الدراما التليفزيونية

المشكلة إن ابو زيد الهلالي كان اسود البشرة.. فكانوا بيدهنوا أحمد عبد العزيز اسود كله.. مش بس وشه.. لا جسمه كله.. بيقعد ساعتين يتدهن يوميا.. طيب خلصنا تصوير.. كل الناس تروح.. وأحمد يقعدوا ساعتين يشيلوله الدهان.. المشكلة انه هيروح ساعتين تلاتة.. وبعدين يرجع يتدهن تاني.. فالموضوع مرهق قوي..

حتى إن فيلم رشة جرئية لاشرف عبد الباقي كان بيتريق على موضوع الدهان دا.. وقاله في الفيلم انت عارف انا اخترتك ليه.. علشان انت الوحيد اللي راشش .. كلهم داهنين..

فأحمد اعتذر.. اللي زود الطينة بلة ان اللي كانت هتعمل دور الجازية.. كانت شيرين سيف النصر.. لانها شبه الجازية اللي بتوصفها السيرة.. هي صورت شوية.. بس اتجوزت واعتزلت وسابت المسلسل ومشيت.. فجابوا نرمين الفقي.. فاحمد عاد اللي صوره مع شيرين تاني..

مش عارف دي معلومة معروفة ولا لا.. بس فريق المسلسل “يسرى الجندي، ومجدي ابو عميرة)، كانوا عايزين عبلة كامل تعمل دور خضرة الشريفة وما تمش الاتفاق .. فـقدموا الدور لفادية عبد الغنى

الجزء التاني صوره جمال عبد الناصر.. وجمال عبد الناصر كان قبلها بسنتين عامل مسلسل مع أحمد عبد العزيز مكسرين بيه الدنيا اسمه الفرسان عن قصة قطز وبيبرس.. فهو البديل الكلاسيكي لاحمد عبد العزيز.. لكنه  عانى من دهان البشره.. فإعتذر.. وجابوا بداله رياض الخولي.. ومش هو بس اللي مشى.. دا المخرج مجدي ابو عميرة ساب المسلسل..

في جزء جمال عبد الناصر
كانت خضرة هي الفنانة عفاف شعيب.. ومعرفش ليه فادية عبد الغني مشيت مع انها مكانتش بتتدهن.. وهما جابوا عفاف شعيب بعد ما هدى سلطان رفضت الدور وقالتلهم هاتوا عفاف شعيب.
وجابوا سوسن بدر بدل نرمين الفقي.. وجابوا عماد رشاد بدال كمال ابو رية..

الجزء التالت عمله رياض الخولى.. ورجعت فادية عبد الغني تعمل دور خضرة.. ومعرفش رجعت تاني ليه ومشوا عفاف شعيب ليه..

ومشوا سوسن بدر وجابوا بثينة رشوان في دور الجازية.. وجابوا غادة عبدالرازق في شخصية (الأميرة علياء) بدل من دلال عبدالعزيز ..

ورغم ان أحمد عبد العزيز بشنب.. وجمال عبد الناصر بشنب.. هما قرروا ان رياض الخولي يكون من غير شنب ودا موضوع مهم قوي.. ولو انت مش عارف ليه.. فانا كمان مش عارف..

المسلسل في الجزء الاول نجح نجاح ساحق..

المسلسل اسمه ابو زيد الهلالي مفيش مرة اسم الممثل اللي عمل ابو زيد اتكتب الاول.. في الجزء الاول.. جمال الليثي كلم احمد عبد العزيز وقاله يوسف شعبان عايز اسمه يتكتب الاول.. فأحمد قاله طبعا وماله دا بيمثل قبل ما انا اتولد…في الجزء التاني حطوا اسم دلال عبد العزيز الاول.. في الجزء التالت حطوا اسم محمد وفيق الاول.. ورياض الخولي كان سادس اسم.. مش عارف ليه

الغريب إنهم كانوا بيكتبوا في اول المسلسل “ألف ليلة وليلة”، مع إن أبو زيد الهلالي مش من قصص الف ليلة وليلة اصلا ولا فيه شهرزاد ولا شهريار.. بس التلفزيون كان متعودين انهم يقدموا كل سنة الف ليلة وليلىة.. فقالوا قطع العوايد وحش.. اكتب الف ليلة وليلة وخلاص واهي كلها حواديت.. وذكريات من كواليس المسلسلات