“ايه ذنب حلمي” قصيده للشاعره هبه جلال
إيه ذنب حلمي يتحضن في حيطان إزاز
فينجرح سور الحكايه يصير نشاذ
من نغمه باهته عالرصيف
عيني طشاس..قلبي الكفيف
بقى زي عدمه من الرصاص
إيه ذنب حلمي يتحضن
في سنين عجاف..
فتموت عشانه المعجزات
يصبح آهات من شخص ميت
وف سكات
إيه ذنب حلمي يصير رماد!!
وف شرع مين يسجد شراعي للحنين
إيه ذنب حلمي يتحضن
في حديد قديم؟
ودموعه صدت مالوجع!!
وأدي الجدع/مشدوه في حلمي المستقيم
إيه ذنب حلمي يتحضن
في شيطان رجيم
يتوهبله ألف دير
تتفتحله كتير جوامع
حلم مين بس اللي سامع غربتي
إيه ذنب حلمي
يكون في لعبة سلسله من وحدتي!
