أحدث أخبار الفن والرياضة والثقافة والمرأة والمجتمع والمشاهير في كل المجالات

“بلاش في النهايات تحرق مراكبك!”

نقلتها لكم /دعاء خطاب

“بلاش في النهايات تحرق مراكبك!” 

اول ما اترقيت وبقيت مدير كان من ضمن
الفريق بتاعى ولد شاطر جدا وناجح
وبيجيب التارجت وكله تمام بس كان
لعبى شويتين.. يعنى بيزوغ كتير وبياخد
اجازات كتيره، وفى مره طلب منى اجازه
علشان يسافر مع أصحابه وانا مرضتيش
فجبهالى مرضى وكلمنى وقالى انا تعبان
ومش قادر انزل والفيلم ده.. قومت انا
عملت ايه؟!

رحت عند بيته من بدرى مانا عارف بقى
كل التفاصيل وعارف أنه مسافر اليوم ده
واستنيته وهو نازل ومسكته تحت بيتهم
وعلمت عليه، اللي هو ادينى عرفت انك
كداب واليوم ده مخصوم بيومين علشان
تبقى تشتغلنى كويس مع نظرتين من
فوق لتحت كده خليت الولد ياعينى
واقف زى الليمونه!!

تفتكروا ايه الى حصل؟؟

قدم استقالته، وخسرت انا ٥٠٪ من ارقامى
اللي كنت بحققها عن طريقه!!

غباء منقطع النظير منى، ايه اللي انا عملته
ده وليه واستفدت ايه!!!

اكتشفت وقتها ان كل حاجه فى حياتى
خسرتها كانت بسبب أنى بزنق اللي ادامي
لدرجه انه مابيلاقيش مفر.. فبيهرب.

موضوع انك تزنق حد اوى كده ملهاش
غير ردتين فعل.. اما يهرب اما يهبشك
علشان يدافع عن نفسه.

وفى الحالتين انت خسران خسران!!

علشان كده دايماً ساعة المواجهه لازم
التراجع يتم فى اللحظه الصح علشان لو
معملتش الحركه دي يبقى خلاص كش
ملك وزنقت الدنيا واتقفل الماتش يامعلم.

مافيش اى انتصار فى انك تكسب نقاش
او توصل اللى ادامك انك كشفته لأنك
فى الحقيقه بتعريه ومافيش انسان سوى
هايستحمل التعريه دي، كلنا بلا استثناء
نتجمل قصاد بعض وده مش عيب مدام
ربنا ساتره تفضحه ليه؟؟!

خلى دايما للى ادامك سكه يرجع منها،
فهمه انك فاهم بس مش اوى وسيبله حته
يستر بيها نفسه.. مش لازم فى النقاش
تثبت انك صح مش هاتفوز بجائزه، مش
لازم فى الخلاف تجرح وتدبح علشان
تنتقم لنفسك، بلاش فى النهايات تحرق
مراكبك.
سيبوا الباب دايما موارب يمكن ترجعوا.

وسيبوا للى ادامكم منفذ يقدر يحمى بيه
نفسه ويستر نفسه علشان لما يرجع.

فى النهايه بلاش تضييق الحصار لأنه مش
انتصار.. الانتصار الحقيقى انك تُبقى على
انسان.. وعلى ستر انسان.

 

دعاء خطاب 

قد يعجبك ايضآ
اترك رد

لن يتم نشر عنوان بريدك الإلكتروني.