أحدث أخبار الفن والرياضة والثقافة والمرأة والمجتمع والمشاهير في كل المجالات

حدوتة هقدر أحمى نفسى بقلم الكاتبة شيماء أبو زيد

حدوتة. هقدر أحمي نفسي.

بقلم.الكاتبة.شيماءأبوزيد…

كان ياما كان ياسادة ياكرام ولا يحلى الكلام الا بذكر النبي عليه الصلاة والسلام.

كان في زمان ولد جميل عنده ست سنين، في يوم رجع من المدرسة سلم على مامته وباباه وباس إيديهم وكمان كان عندهم ضيوف سلم عليهم ودخل بسرعة يغير هدومه ولكنه نسي باب الأوضة مفتوح، جريت ماما بسرعة وقفلت الباب وبعد ماالضيوف مشيوا، ماما قعدت معاه

وقالتله:حبيبي؛ زمان انت كنت صغير مكنتش بتعرف تاكل أو تشرب لوحدك؛ وكنت أنا اللي بعملك كل حاجة وأنا وبابا اللي دايمََا بنساعدك لأنك أغلى عندنا من نفسنا وانت أكتر إنسان بنحبه في الدنيا..
رد الولد وقال:وأنا كمان ياماما بحب حضرتك

وبحب بابا جدا، وحضن مامته ورجع قعد مكانه بسرعة تاني لأن ماما كان عندها كلام مهم جداً.
كملت ماما كلامها وقالت:دلوقتي إنت كبرت وبدأت تعمل حاجات كتير لوحدك ولازم تتعلم كمان إن جسمك مهم وغالي وملكك لوحدك.

رد الولد وقال:عارف يامامتي عندي عيني ملكي لوحدي وودني بتاعتي كمان وشعري وايدي ورجلي كلهم ملكي لوحدي صح؟

ضحكت ماما وطبطبت على راس الصغنن الجميل من حبها وفرحتها بيه وقالت:طبعََا ياروحي؛ لكن في أماكن كمان خاصة جدََا بيك لوحدك مش صح إطلاقاً حد يشوفك وانت بتغير ولا وانت في

الحمام مش من حق اي شخص نهائي يعمل كده. انت جميل ولازم تحافظ على نفسك وانت كمان اتعلمت تاخد الدش بتاعك لوحدك من غير مساعدتي صح؟

رد الولد بفرح كبير:طبعاً ياماما وبكون فرحان جدا.
ردت ماما وقالتله:لأن أنت كبرت وأصبحت ولد جميل وهتتعلم تحمي نفسك وتحافظ على الأماكن الخاصة بتاعتك. اتفقنا…

رد الولد بحماس شديد:اتفقنا يامامتي.
وتاني يوم الولد الجميل راح المدرسة وبعد مارجع قال لمامته ياماما في حاجة حصلت في المدرسة وعايز احكيهالك.

قعدت ماما وبتسمعه بإهتمام شديد جدا
قال الولد:في ولد النهاردة في المدرسة قاللي ادخل معاه الحمام وانا رفضت وجريت على المدرسة بتاعتي وحكتلها؛ هو أنا كدة غلطت يامامتي..
ماما فرحت جدا بتصرفه وعبرتله بفرحتها بحضن كبير جداً ليه وقالتله: برافو ياحبيبي.

وقال الولد كمان:انا اتعلمت في المدرسة النهاردة إني لما أروح البحر لازم اخبي جسمي علشان محدش يشوفه ولو حسيت ان حد بيلمسني لمسة غلط أجري أقول لماما أو بابا على طول ومهما حد قاللي على سر اجري احكيه لمامتي لأنها أكتر

إنسانة بتحبني ومفيش سر على مامتي نهائي.
ماما كانت سعيدة جدا بإن الولد الجميل فهم ازاي يحافظ على نفسه وقالتله:انا فخورة بيك جدََا لكن عايزة اقولك حاجة كمان؛ لو حد قالك إقلع

هدومك، هو ده ينفع؟!. رد الولد وقال لا يامامتي لازم ازعق واجري اشوف حد كبير يحميني لأني إنسان وليا كرامة ومن حقي أحافظ على جسمي.
وتوته توته خلصت الحدوته إستنونا في حدوتة جديدة مفيدة من حواديت ماما شيمو…

 

قد يعجبك ايضآ
اترك رد

لن يتم نشر عنوان بريدك الإلكتروني.