حلا شيحة رداً على كلام والدها أحمد شيحة “مصدومة من الكلام اللي والدي قاله”
حلا شيحة رداً على كلام والدها أحمد شيحة “مصدومة من الكلام اللي والدي قاله”
كتبت: انجي عبدالسلام
ردت الفنانة ” حلا شيحة على تصريحات والدها الفنان التشكيلي ” أحمد شيحة” عبر موقع التواصل الإجتماعي “انستجرام” قائلة: “الحقيقة مصدومة من الكلام اللي والدي قاله عن زوجي اللي اتجوزته بكامل ارادتي و الحمد لله لقيت معاه كل المعاني الجميلة من احترام و رجولة و شهامة نادرة الايام دي، وانا لم يخطفني احد كما قال والدي و الكلام ده لا يصح ابدًا، انا بحب زوجي و سعيدة بحبه ليا و بنحترم بعض و معز بيحترم رايي و بيقدر مشاعري و بالعكس هو دائما بيهدّيني، وطبعا بيساندني ويشجعني لاني زوجته و حبيبته، وهو اكبر بكتير من كل الكلام اللي بيتقال عليه و افتراءات مش صحيحة، وهو ابعد ما يكون عنها”.
وأضافت: “لن اسمح لاحد الكلام عنه و لن اسمح بأي تصور خاطئ عنه بأي شكل من الاشكال، “مُعز” طول عمره له رؤيته الواضحة في الدين و حتي في الفن، وهو ليس مع اي جماعة او فئة معينة هو يمثل نفسه و له افكاره وارائه العلمية و الدينية المختلفة الجميلة، وليس لاحد ان يصنفه او يضعه في اي قالب فقط لأن هواه لا يوافق ما يمثله مُعز “.
هو في ايه في بلدنا الايام دي بنحارب و نصارع في بعض و عايشين في قصص وهمية من نسج خيالنا عن بعض.
هو خلاص اي حد يتكلم بلغة الدين لازم يبقي متطرف او اخواني هو مبقاش في مسلمين وسطيين طبيعين هو ليه كل انواع الهجوم ده علي اي حد، انا زعلانة من والدي جدًا لانه يعرف “مُعز” كويس جدا و قعدوا مع بعض كتير ووالدي يحبه جدا و شاف منه كل خير.
“مُعز” زيي اتجوز ١٤ سنة من عمره و كان مستقر في حياته و عنده ثلاث اولاد ربنا يخليهمله جمال ماشاء الله، وعمره ما كان بتاع ستات زي ما بيتقال كلام لايليق ابدًا، وفي الاخر زيي لم يكمل جوازه و حدث الطلاق، وكلنا معرضين لده طبيعي انه كان بيحاول زي اي راجل محترم انه يلاقي استقرار في حياته في الحلال و متوفقش اكتر من مرة و دي مش حاجة تعيب أي حد، والحمد لله اتقابلنا و تلاقينا لان ظروفنا قريبة جدا و عندي اولاد مثله و اولادنا شبه بعض الحمد لله و استقرينا احنا الاتنين ليه ده يزعل الناس بدل ما ندعي لبعض بالخير بقينا نتصيد لبعض، ونخوض في اعراض بعض هو حصل في مجتمعنا ده احنا جرالنا ايه.
و أختتمت قائلة : “في الاخر بوجه كلمة لوالدي الحبيب ان لا يصح ابدا كلامك مع كامل احترامي لك و للجميع، انا الحمد لله سعيدة في حياتي و مع زوج اتشرف انه زوجي و بعتز بيه و احنا اصدقاء قبل ان نكون أزواج، و كل كلمة اكتبها و قلتها نابعة مني و انا متدينة بطبعي زي اي ست مصرية بتحب دينها وده لا يعيبني، وتديني اللي بدأ من اكتر من ١٥ سنة من المنطقي ان مُعز مش هو سببه
مش محتاجة حد “يخطفني” او يكتب عني او يوجهني، هذا كلام لا يليق، دعوا الخلق للخالق و كل واحد يخليه في حاله، وياريت نسمع من بعض بدل ما نسمع عن بعض، احسنوا الظن.
ومن ثمَ قامت بغلق التعليقات على هذا البوست، وجاء هذا التصريح بعد كلام والدها أحمد شيحة عبر مداخلات تليفزيونية عديدة.
اوضح فيها ان تصريحات ابنته حول فيلم «مش أنا» بطولة الفنان تامر حسني غريبة والجميع يرفضه، قائلًا: “دي مش حلا ولا كلام حلا، وده مش طبيعة حلا، دي كانت بتعمل الفيلم بكل حب، أمها وأنا وأخواتها أصيبوا بالصدمة من تلك التصريحات”.
وأضاف، “أنا قولت إن بنتي معمولها كمين، أنا مكلمتهاش من وقتها، أمها اللي كلمتها وعاتبتها جامد، والبنت كانت مترددة أثناء الرد”.
ودخل الفنان التشيكلي في نوبة من البكاء على الهواء: “فيه ضغوط شديدة على البنت، لازم نفكر، دي بنتنا، إحنا كلنا وقفنا ضد البوست، أنا بتكلم بكل قوة كأب وفنان، أنا أكتر واحد ضد هؤلاء الجماعات، أنا حزين إن الناس عملت نفسها قضاة ويقولوا أحكام على بنتي بدون ما نفكر، لازم نتوقف كثيرًا ونفكر”.
وأوضح، أنه لا يعرف إن كان أخواتها تواصلوا معها أم لا، معبر قائلًا، “كلهم زعلانين ومامتها زعلانه وكلنا زعلانين، أنا بقول بكل صراحة، أنا لن أسمح باختطاف حلا بأي حال من الأحوال وهقف ضد أي حد في الدنيا، لما حدث يعمل عملية زي دي، عمرها ما قالت الفن حرام أبدا، لا لما اتحجبت وقعدت فترة طويلة ولا دلوقتي، عمرها ما قالت كدة”.
ووجه رسالة لها باكيًا، قائلا : “يابنتي زي ماقلتلك عندما يكتمل إيمانك هتعرفي إن كل الكلام ده مالوش علاقة بربنا، الله هو الجمال والإبداع والابتكار، ياحلا اعتذري لمصر كلها على اللي كتبتيه”.
