أحدث أخبار الفن والرياضة والثقافة والمرأة والمجتمع والمشاهير في كل المجالات

حلم تفصيل .. كتبت / دعاء جلال

عادى.. مش مهم .. تمام ..عدي ياعم عدي يا ست الكل عدوا .. عدوا وخلاص زوقوا معايا الأيام خلونا نخلص وخلاص بلا وجع قلب هو فية حد بيتغير ؟؟ هي فية حاجة أصلاً هتتغير ؟!! أهو اللي بنبات فية هنصبح فية .. الاحلام دى للناس المرفهة التوتو بس أحنا ربنا خالقنا للشقي والتعب وبس .. أنا أصلاً مبقاش حاجة بتفرحني ولا حاجة بتزعلني أصلاً عادى .. خلينا عايشين في الهم الفرحة نسيبها لناسها وأهلها .. خالينا أحنا شايلين الهم وبس ملناش غيروا .. والله الواحد خايف يحصلة حاجة من كتر الحزن اللي حاسس بية والزعل ولا لية ما أحسن ربنا يريحنا بقي وياخدنا عندة بدل وجع القلب والبهدلة اللي الواحد فيهااااا .. تعبت خلاص أنا مش قادرة علي العيشة دى يارب خدني بقى وأرحمني ………… لا لا لا مش أنا اللي بقول كدة متفرحوش أوي ههههههههه صدقتني وأسقطت مشاعرك عليا وحسيت أني بقول كدة لا طبعاً خالص أنا مش ضعيفة أوي كدة أنت بقي قولي كام مره قلت كدا لنفسك أو للناس ؟ كام مره سودتها فى وشك وقفلتها بالضبة والمفتاح ؟؟ كام مره بعدت عن إيمانك بربك وضعفت بالشكل دا وقلت لنفسك أنا عايش وخلاص ؟؟؟
لا أنت مش عايش وخلاص وربنا أما خلقك مخلقكش علشان تعيش وخلاص فكر أنت موجود لية وشوف عندك كام نعمة مش عند غيرك وشوف ربنا مميزك بأية وحاول تفهم اللي بيحصلك وبتمر بية وتعبك علتة أية وجايلك أنت لية والمغزي أية ؟؟؟ بدل ما تستسلم وترمي طوبتها فكر وتدبر وتعقل .. متمشيش بمبدأ من خاف سلم لا من خاف عاش خايف وقلقان وتعبان وركبتة أمراض النفسية والعضوية ، لا من خاف مات من الخوف وأنتهي بلاش تخطط لهزيمتك وتنسي أن مجرد وجودك في الدنيا بهدف فمابالكم بكل شيء بتمروا بية وبتختبروه وبتتعب فية
((أَفَحَسِبتُم أَنَّمَا خَلَقنَـاكُم عَبَثاً وَأَنَّكُم إِلَينَا لاَ تُرجَعُونَ فَتَعَـالَى اللَّهُ المَلِكُ الحَقٌّ لاَ إِلَـاهَ إِلاَّ هُوَ رَبٌّ العَرشِ الكَرِيمِ))
يبقي مش أصلاً عادى ولا ينفع يبقى أهي عيشة والسلام ولا ينفع نزق اليوم ولا هنخاف علشان نسلم ولا يصح أن يكون رب الكون خالقك للهم والتعب فوق لنفسك وتأدب لتكون طاعة حتي علي الاقل وطالما أنت شايف أنها هتعدي خليها علي الأقل تعدي بسهولة وبساطة ورضا بلاش تعديها علي جثتك يعني !!! وتبقي زي نزير الشؤم في حياة نفسك وغيرك والله الدنيا ما متحملة وجع قلب وحزن ..
بلاش يا جماعة ندوس علي نفسنا أوي كدة لأن ملهاش إعادة خليكم ديماً خفاف علي بعض وقلوبكم مليانة رحمة وطيبة فالراحمون يرحمهم الرحمن ويتولي أمورهم وينصرهم ويفتح لهم فتح قريب فأبواب الله لا تغلق أبداً .. مش هتغيروا الظروف ولا هتغيروا الناس ولا هتستنوا حد يفرحكم ولا حلم يتحقق لكم .، هتغيروا نفسكم وهتعتزلوا من يؤذيكم وترضوا لأن الرضا نعمة وعبادة وتدوروا على حلم علي قدكم مش مهم عظمتة ولا كبروا المهم تستمتعوا في السعي لية ومجرد محاولة تحقيقة يااا سيدى فصلّك حلم أيوة أعمل حلم تفصيل أشتغل علية غرزة غرزة وعيش فرحتة حتى لو مكانش أحلي حلم بس في كل الاحوال هيبقى مقاسك وعمايل أيدك فتفرح بية وتستمتع بالرحلة وتحس الشغف والانجاز والانتصار عاوز أية أحلي وأجمل من كدا ؟؟
أفتح الضبة والمفتاح وروح فصل لنفسك حلم .

أستشاريه علاقات Life coach
اخصائيه علاج نفسى وسلوكى وتنميه مهارات وتعديل سلوك أخصائى نفسى أكلنينكى دبلوم صحه نفسيه وباحثه فى العلوم الانسانيه .،
دعاء جلال .

قد يعجبك ايضآ
اترك رد

لن يتم نشر عنوان بريدك الإلكتروني.