أحدث أخبار الفن والرياضة والثقافة والمرأة والمجتمع والمشاهير في كل المجالات

حوار| أحمد كرارة: أتمنى تجسيد شخصية رشدي أباظة..ونجومية أخويا مش هتفرضني على الناس

أحمد كرارة: أعشق التمثيل منذ طفولتي وأحلامي فيه تحققت بالصدفة

فنان عصامي جداً، أراد وضع بصماته الفنية التي تدونها أعماله في تاريخه المهني بنفسه، دون الاستعانة بنجومية أقرب الناس إليه، دخل المجال الفني منذ فترة قليلة لا تتعدى الـ3  سنوات تقريباً، لكن موهبته الحقيقية جعلته يمشي بخطوات ثابتة فواثق الخطوة يمشي ملكاً، إنه النجم المتألق “أحمد كرارة”.

 

FB_IMG_1545856517953

أردنا الخوض داخل تفاصيل حياته التي تختبيء خلف الكاميرات لـ تنفرد بها الكواليس، فما كان من ” أسرار المشاهير” إلا أن تُسلط  الضوء على تلك الكواليس للكشف عن أسرار في حياة أحمد كرارة، وذلك في حوارنا التالي:

**متى بدأ حبك للفن والتمثيل؟ ولما تأخرت في تلبية رغبتك من دخول المجال؟

من وأنا عندي 9 سنين بحب التمثيل وأنا بتفرج على الأفلام وأقلد الممثلين، مكنتش متعمد التأخير، بس الدنيا كانت مقفولة على الفن زمان والحياة شغلتني شوية لإني كنت مدير في بنك وبعد الثورة سافرت دبي واشتغلت فترة هناك فانشغلت الفترة دي كلها وخاصة إن حياتي كانت ماشية ومستقرة جداً، حتى مؤخراً قررت إن التمثيل يكون حب وهواية وجنبهم بيزنس تاني برده، يعني التمثيل مش هيكون كل حياتي ووجودي فيه لإني بحبه بس.

**متى قرر أحمد كرارة أن يخوض التجربة العملية ويطرق أبواب الفن؟

هي جت معايا بالصدفة الحقيقة، الموضوع بالنسبالي إني كنت بحلم بحاجة واتحققت من عند ربنا

**لما فضلت أن تبدأ طريقك من الصفر دون الاعتماد على نجومية أخيك “أمير كرارة”؟

لإن مفيش بني أدم مش موهوب بيفرض نفسه على الناس، أنا اشتغلت من فترة قصيرة تقريباً سنتين ونص، بس اشتغلت بموهبتي وسايب الحكم للناس، مش هشتغل غصب عن الناس لمجرد إن أخويا ممثل، وأنا في خلال السنتين ونص دول الحمد لله عامل أعمال حلوة، وبعدين اللي بيلجأ لحد ده بيكون مش لاقي وأنا الحمدلله ربنا كارمني جداً.

FB_IMG_1545856555633

**ماذا عن رد فعل أمير كرارة عندما أخبرته أنك ستخوض التجربة؟

قالي تمام جداً، جرب وشوف قبول الناس ليك طالما إنت حابب الموضوع

**من أكثر شخص دعمك عند دخول مجال الفن؟

ربنا أولاً، ومن بعد ربنا الناس، لإن أفضل وأحسن دعم بالنسبالي هو الناس، الجمهور هو كل حاجة ودعمهم عندي رقم واحد، وهفضل شغال لحد أخر واحد حابب يشوفني، ولو قالي أقف متمثلش هحاول تاني وتالت لحد ما أثبتله إني قد المسؤولية والثقة وزي ما هو حابب يشوفني، لإني مش بني أدم يائس، أنا عنيد جداً وهحاول لحد ما أوصل.

**على أي شيء تعتمد في اختيار أدوارك؟

بحاول أختار الأدوار المؤثرة اللي ليها معنى حتى لو صغيرة، تأثير الدور في الجمهور هو اللي بيحكمني سواء كان خير أو شر مش مهم، زي ما كنت ضيف شرف في “كلبش2” مع أمير كرارة والمشهد علّق مع الناس جداً، ومسلسل بالحجم العائلي مع يحي الفخراني برده مظهرتش فيه غير 13 حلقة بس، لكن أنا الوحيد اللي اتكرمت عنه في مهرجان الفضائيات العربية.

FB_IMG_1545856574030

**إذا عرضنا عليك إختيار شخصية مؤثرة لتجسيد سيرتها الذاتية فمن تكون تلك الشخصية؟ ولماذا؟

رشدي أباظة، عنده كاريزما رهيبة، ده باختصار بني أدم عرف يلعب كل حاجة وكل حاجة عنده مكتملة، لعب الشر هايل، الكوميدي رائع، الدراما ممتاز

**إسم فنان تقتضي به من الزمن القديم؟

كتير أوي من القديم الحقيقة رشدي أباظة،عمر الشريف، أحمد رمزي، ومحمود المليجي

**فنانة كنت تؤمن بأدائها وتصبح ضعيف أمام أعمالها؟

هند رستم طبعاً، ولإن الجيل اتغير معتقدش إنها هتتكرر تاني

**ما رأيك فيما وصل إليه حال الفن وهبوطه في بعض الأحيان؟

مش بشوف الحاجة الهابطة الحقيقة ومبحاولش أعرفها، بختار اللي أتفرج عليه بعناية شديدة

**أحمد كرارة شخص هاديء أم عصبي؟

عصبي جداً

**ما الذي تمثله المرأة في حياة أحمد كرارة ؟

شيء مهم جداً، هي الجزء الأساسي في الحياة، هي الراحة والحنان والأمان، هي نص الحياة وأكتر من نص الحياة كمان

**إلى أي مدى طموحاتك في التمثيل؟

لسه طموحاتي مبتدتش أصلاً

**ماذا عن جديد أحمد كرارة من أعمال فنية قادمة؟

حالياً بصور مسلسل اسمه بحر، 60 حلقة بطولة ماجد المصري، إخراج أحمد صالح وتأليف أحمد عبدالفتاح، المسلسل صعيدي بس أنا دوري مش صعيدي لأن المسلسل نصه في الصعيد ونصه في القاهرة، معظم مشاهدي مع محمد دياب واحنا الاتنين متواطئين على ماجد اللي بيجسد شخصية بحر، وأنا اسمي رمزي ودياب اسمه ربيع وماجد اسمه بحر، وباختصار أنا بلعب دور شخص بيحب الفلوس جداً وبيعمل أي حاجة عشانها.

FB_IMG_1545856542499

**هل هناك من أعمال جديدة للموسم الرمضاني المقبل؟

لسه والله شوية، بس في مسلسل حالياً تحت الدراسة ، شبه مضيت عقده ، هو 45 حلقة.


**وجه رسالة لـ أمير كرارة

إنت تعبت وشقيت ومطلعتش على كتاف حد عشان كده ربنا إداك على قد تعبك وأكتر شيء مفرحني إني مشوفتش حد مبيحبش أمير كرارة سواء على المستوى الفني أو الشخصي، وأنا من الفانز بتوعه بحب تمثيله وبهتم بيه جداً

**بما إن الفن والفنانين قدوة وجه رسالة لمجتمعنا عقب انتشار ظاهرة التنمر الذميمة التي حولته من الإيخاء إلى الكره والعداء؟

“متحاولش تحلم حلم حد تاني”…يعني لو كل واحد عاش حلمه محدش بيضايق حد، كل واحد هيخليه في حاله ومالوش دعوة بحد تاني ومحدش هيبص لحد خالص ولا يحاول يدخل في مقارنة معاه وينشغل بحلمه هو وحياته وبس

قد يعجبك ايضآ
اترك رد

لن يتم نشر عنوان بريدك الإلكتروني.