خاص .. محمود محى لـ اسرار المشاهير : خبر اعتزالي الفن شائعة وانتظروا جديدي قبل 2020
مساعد رئيس تحرير موقع المشاهير
يتجدد اللقاء مع احد الشخصيات التى تركت بصمة كبيرة في مجالها .
واليوم سنكون مع احد الشخصيات التى لفتت الانظار اليها فى مجال الغناء فور التحاقه برنامج المواهب الشهير ستار اكاديمي وحصوله على لقب الموسم 9 من البرنامج ثم بدأ مشواره الغنائي بطرح عدد من الغنيات منها «إنسانية، و يا دايب في النسيم، وشكرا للرجالة»، وغيرها.
لكن فجأة وبدون أي مقدمات انتشرت اخبار باعتزاله الفن وسفره لإحدى البلدان العربية للعمل بها واختفى بعدها لمده كبيره لم يعرف الجمهور عنه شئ انه المطرب ذو الحنجره الذهبيه محمود محى سيفتح قلبه لنا ويخبرنا عنه وعن سبب اختفاءه من الساحه الغنائيه .
– فى البدايه احب ان ارحب بك و حدثنا عن محمود محى الذى لايعرفه احد ؟
انا محمود محى من محافظة أسيوط بغني وانا عندى 7 او 8 سنين تقريبا وبدايتي مع مسرح الدولة وقصور الثقافة ووزارة الشباب والرياضة لفيت مصر كلها وسافرت برا مصر فى كذا دوله بشارك فى مهرجانات والحمدلله فى كل مهرجان يدخلوا بحصل على المركز الاول دايما كنت بحب اشارك فى اي حاجه تبع محفظتي او تبع الدوله .. تخرجت من كلية تجارة انجليزى دفعة 2012 .
– ماهو برجك الفلكي ؟
بنسبه لموضوع الابراج فانا بصراحة مش بؤمن بيها بس انا مواليد 6 /7
– من اكتشف موهبتك ؟
اول حد اكتشف موهبتي فى الحضانة كنا بنغني اناشيد فى الحضانه والميس وقتها قالت صوتي حلو ودخلت ابتدائي فانا بغني من زمان قوي .. وماما طبعا كانت بتشجعني جدا من وانا صغير وبابا الله يرحموا برضوا كان بيشجعنى .. وفاة والدي اثرت فيا كتير هو توفى وانا فى اولى ثانوى فقداني ليه خلانى دايما مستعجل عايز اعمل حاجات كتير قوي وانا صغير .. فالوالد لما بيتوفى بدري البني ادم بيحس انه لوحده وعايز يثبت لنفسه ولوالده وللناس انو كويس .
– هل برامج المواهب تقف مع مشتركيها بعد تخرجهم منها ؟
بنسبة لبرامج المواهب طبعا مبتقفش مع حد مافيش برنامج بيقف مع حد .. اي برنامج اكتشاف مواهب بـ يعتمد على الموسم نفسه وعلى إيرادات الموسم نفسه وازاى يقدر يجيب اكتر مكسب فى الموسم خلص الموسم بينتهى علاقته بيك لان فى الاخر هو تعاقد الشركة المنتجة وبين القناة لإنتاج موسم ناجح خلص الموسم شكرا حتى لو فى وعود نادر مايتنفذ زي ما هيا .
– لما اختفى محمود محى ؟ وما رأيك فى اخبارك الخاصة بـ اعتزالك الفن وسفرك ؟
انا اختفيت فتره ده حقيقي فعلا نظرا اني تعبت شويه وحبيت ابعد شويه بس باقيت من وقت لتاني بنزل حاجه لغاية ما اعيد تفكيري .. ونزلت فى الفتره دي اشاعات ال يقول سافرت وطبعا مش زي ما الكلام ده بيتقال خالص الفكره ان الواحد عايز يعمل مشروع بزنس جانب الغنى فكرت اني اعمل البوم واشتغلت فيه شويه وبعد كده وقفت ورجعت دلوقتى اكمل الالبوم وتقريبا الالبوم خلص بس طبعا الالبوم انتاجه صعب جدا انا اعرف ناس بتقعد 7 سنين علشان ينتجوا اول البوم بعد كده تاني وتالت البوم بيخلص فى سنه سنتين عادي مش مشكله بس اول البوم بياخد فتره عشان ده ال هيطلعك اكون او لا اكون .. فالاخبـار كلها كدب ال كانت بتتقال عليا واشاعات ومعرفش جابوا الكلام ده منين كل ده ليس له اي علاقة بالحقيقة انا موجود فى مصر اصلا ومفيش اي مشاكل بنسبالي بروح وباجي من السعودية عادى جدا اعمل عمرة واخويا هناك شغال فى شركه بروح اقعد معاه شويه واغير جو واعمل عمرة ورجع فـ البزنس بتاعي فى مصر .
– هل ترى نفسك اتظلمت فنياً ولماذا ؟
اه طبعا اتظلمت بس انا مابحبش اتكلم فى النقطه دي كتير خلاص لان مافيش وقت اتكلم على ال فات لازم اتكلم على ال جاي .
– ماجديد محمود وهل من الممكن ان تنتج لنفسك اغاني ونشرها عبر السوشيال ميديا كونها أصبحت وسيلة هامة لدعم المواهب ؟
ال جاي باذن الله فى خطط وفى حاجات قبل بداية 2020 بإذن الله تكون اتنفذت وحاجات نزلت .. السوشيال ميديا خلت الموضوع سهل على الناس انك تختفي وترجع تاني بقوة بجانب الصحف فالاخبار دايما الكويسه بترجع الفنان تاني لمكانه ولما بينزل بشغل محترم بيخلي الناس ترجع تفتكروا بشكل كويس .
– رسالتك لمحبيك و لمتابعيك الذين يتمنون أن يحقق محمود محي اماله الفنيه ؟
بصراحه عايز اوجه رساله للناس كلها ال استنتني كتير ونفسها تسمع حاجه كزيسه انا باذن الله مش هخيب ظنكم و هتسمعوا حاجه محترمه تليق بمصر وقيمة مصر .. بسبب الإسفاف ال حصل خلى ناس كتير مش مصريين يخدوا انطباع مش كويس عن البلد وعن الفن فى مصر ودي مش الحقيقه طبعا .. مصر أكبر بلد فيها موهوبين واقوى بلد فيها قوه ناعمه ومؤثره جدا والدول العربيه كلها بتتكلم مصري كويس عشان الافلام والمسلسلات القوية وعشان الاغاني بتاعتنا آل وصلت للعالم كله احنا فى مرحلة محتاجين بس الفن المحترم والفن الهادف يظهر وهو ال يتصدر دايما فمش اي حد يطلع ويتصدر لان ده بيشوه وجهة البلد فان شاء الله هعمل حاجه تليق بمستوى مصر والمصريين وان شاء الله بلدنا تبقى أحسن بلد فى الدنيا واجمل بلد فى الدنيا .
وفى نهاية هذا اللقاء اريد ان اخبرك اني تشرفت بعمل هذا الحوار متمنيه لك بخالص الامنيات بالنجاح وفى انتظار البومك الجديد .
والى اللقاء احبائي القراء متوعدة لكم بمزيد من اللقاءات مع شخصيات اخرى ..
مع تحياتي الصحفيه مي اسماعيل محمد
