أحدث أخبار الفن والرياضة والثقافة والمرأة والمجتمع والمشاهير في كل المجالات

ذكرياتي مع علي حميدة و فوازير شريهان بقلم المخرج رضا شوقي

ذكرياتي مع علي حميدة و فوازير شريهان

في أثناء تصوير فوازير حول العالم للاستاذ الرائع فهمي عبد الحميد سنة 1988 ومن بطولة شريهان الفنانه العظيمه
ذات يوم كانت فيه شريهان متوترة جدا على غير عادتها المرحه.. و تكلمت معي قائله : مين ده يا استاذ رضا !؟ انا مش هغني ومش أمثل الاستعراض ده معاه .. انا معرفوش!!!
.. واشارت الى الفنان علي حميدة الذي كان في بداية حياته الفنية وقد رشحه الموسيقار العظيم منير الوسيمي لغناء فزوره عن إحدى الدول العربية وجاء خصيصاً من مرسي مطروح في عربية بيجو 7 راكب الوسيلة الوحيدة للانتقال في ذلك الوقت.. يهديكي يرضيكي يا شريهان الرجل صوته حلو .. مفيش فايده ،ايه الاحراج ده طيب اقول ايه ل علي !؟ اتجهت للأستاذ فهمي وأنا في موقف لا أحٌسد عليه فقال لي خليه يغني الفزورة في استديو الصوت 45 علي التراك الخاص به..

ذكرياتي مع علي حميدة و فوازير شريهان

و قد كان ثم تعشينا وصحبته بعدها إلى بنسيون في وسط البلد بجوار سينما ريفولي.
حميدة كان احساسه عالي جداُ ، فهم طبعاً ان شريهان مش مقتنعه بيه .و المهم انه تفهم الموقف وقبل اعتذاري…
بعد فترة .. قابلته مرة ثانية في التليفزيون بعد النجاح الغير مسبوق اغنيه لولاكي وبعدما اصبح نجماً مشهوراً جدا ،
رايته فتوارت منه خجلا وقلت في نفسي بلاش افكره بالموقف السخيف ده ..لمحني وناداني واخدني بالحضن وقالي انت مكسوف يا استاذ رضا مني !؟ قلتله اكيد ..ضحك وقالي اسمع بقيه الحكايه: قابلت شريهان في مناسبة وكنت يغني “لولاكي” والناس هاتكسر الصاله من الإعجاب. لقيت شريهان جايه تهنئني وتتعرف عليا وقالت لي انت هايل جداا واغنيتك رائعه وصوتك عظيم ازاي انا ما اعرفكش !؟
أضاف علي قائلا بضحكه عاليه صافيه: بصيت لها وفكرتها بالموقف ورفضها ليا .. افتكرت طبعاً ،وكانت المفاجاه ان شريهان قعدت تضحك وتصرخ بهستيريه وتحضني وتعتذر وتقولي مش ممكن ياعلي انا اسفه وبقينا اصحاب جدا بعدها

علي حميدة

اكتب هذه القصة الآن لكي يعرف الجميع مقدار جمال و بساطة الدكتور علي حميدة.. و ان الفنان مهما كبر فلا يتكبر عن الاعتذار عن خطأ مثلما فعلت الأستاذة شريهان امام جميع الحضور
الله يرحم علي حميده.. وكل الحب والتقدير والاحترام لشريهان اروع واطيب انسانه وفنانة اشتغلت معاها.

 

قد يعجبك ايضآ
اترك رد

لن يتم نشر عنوان بريدك الإلكتروني.