غابة … بقلم/ غرام نعيم
غابة
بقلم/ غرام نعيم
المزيد من المشاركات
غابة ومليانة وحوش
متخفيين في وشوش
لأشكال بني آدمين
وأسامي ناس عايشين
تحكمهم الأهواء
لا ضمير ولا أخلاق
لا قانون يوم يردعهم
ولا حاجة بتوقفهم
منطقهم القوة
ولا حول ولا قوة
اعمل بقى فتوة
حتسود وبالقوة
وده منطق الغابة
مافيهاش مكان لغلابة
وفي يوم من الأيام
والكل كانوا نايمين
الدب أعلن إنه
النوم حيبقى حرام
وخلاص مفيش سلام
دقت طبول الحرب
ومن الشرق جاي عالغرب
وف لحظة كان عدوان
واتشتت الظبيان
انطفأت القناديل
وانقلب الغنا لعويل
أومال فين الأسود
مش برضو كانوا ملوك
وكلامهم كان بيسود
وفين برضو العهود
طب فين النمور فين الثعالب
مستنيين الغالب
فيه منهم اللي خايف
وشوية في التحالف
والدنيا دوارة
ومهما كنت غالب
طبع الزمن قلاب
راح ييجي يوم فيه حساب
تتغير الموازين
واللي معاك اليوم
بكرة يكون مع مين
وأدينا منتظرين
الدور الجاي على مين
