أحدث أخبار الفن والرياضة والثقافة والمرأة والمجتمع والمشاهير في كل المجالات

” غير كده المركب حتاخدكم وتغرق!! “

متتجوزيش لو مبتعرفيش تقولي.. الجزء الأول

” غير كده المركب حتاخدكم وتغرق!! “

كلمتين للزوجه الصالحه.. 

الحياه الزوجيه مش خناقه وحقي وحقك وأهلي وأهلك.. مع بعض خلينا نُشير لأهم النقاط الشائعه بين اي زوجين في بداية حياتهم. 

متتجوزيش.. 

لو مبتعرفيش تقولي حاضر ونعم وحقك عليّا وزعلك عندي بالدنيا.

متتجوزيش.. 

لو مش فاهمة أن أوقات كتير ممكن تقولي أنا آسفة حتى لو أنتِ مش غلطانة ومعملتيش حاجة لمجرد أنك تطيبي خاطر زوجك وتحسسيه أنه زعله متقدر ومشاعره غاليه عندك. 

متتجوزيش.. 

لو مش قادرة تفهمي طباع الرجل وفطرته وتركيبته المختلفة تمامًا عنك، وأنكم هتقعدوا فترة محترمة تقربوا لبعض وجهات النظر واحتياجاتكم وتصبروا كتير لحد ما كل واحد يفهم التاني، لا هو عمره هيكون أسماء صاحبتك اسماء ولا أنتِ هتكوني مدحت صاحبه.. كل واحد فيكم بيستقبل الأمور وبيشوفها بتركيبته وفطرته فلازم تفهمي الاختلافات بين الرجل والمرأة علشان تقدري تتعاملي.

متتجوزيش.. 

لو مابتعرفيش تتخانقوا بإحترام.. آه والله وده من الخطوبة، لو لاقيتي أن كل خلاف بينكم لازم صوتكم يعلى فيه وممكن يحصل تجاوز في حقك منه أو تجاوز في حقه منك أو تتكلموا بعدم احترام مع بعض، فاعرفي أنكم غير مؤهلين لسه، أهم ما في الخطوبة أنكم تتعلموا تديروا خلافاتكم ومشاكلكم بدون تطاول وبدون تجريح وأذى .

متتجوزيش.. 

لو مش عارفة أن الزواج مسئوليات كتير فوق بعض وحياة فيها الصعب اللي لازم تتأقلمي عليه وتتحمليه، وفيها الجميل الي بيهون الصعب ده، والحياة مش وردية طول الوقت بالشكل اللي أنتِ متخيلاه خالص لكن في ايدك تحليها، وتسعدي بيها. 

متتجوزيش..

لو هتفضلي واقفة على الواحدة، أنا عارفة أن النساء بتتجرح بسرعة وأقل شيء بيأثر فيها ودي طبيعتها ولا بأس، بس بلاش جو دراما كوين ده الله يباركلك .. فرقي بين هرموناتك ومشاعرك الطبيعية.. وبين أنك تكوني اوفر ونكد زيادة عن اللزوم وبتعملي من أقل حاجة مشكلة كبيرة.

متتجوزيش..

لو مش عارفة يعني إيه أنثى وأنك أوقات كتير هتستخدمي ذكائك الأنثوي علشان تحافظي على بيتك، الكلمة الحلوة والطبطبة ومعلش وحقك عليا وأيوة عندك حق .. بتمشي المركب وبتعدي مواقف كتير.. لولا احتوائك للأمور كانت المركب غرقت.

الزواج محتاج صبر وصبر وصبر..وتأقلم

علشان تلاقي بيت طيب وهادي، غير كده
المركب هتاخدكم وتغرق.

حلقه في ودنك! 

المرأه… الزوجه.. الحبيبه.. الأنثى؛ عليها
دور كبير ومهم ورئيسي في إستمرار الحياة 
الزوجيه واستقرار الأسره بالشكل السليم اللي 
كلنا نتمنى نعيشه.. بعقلها تعرف تحتوي الزوج واي مشكله تنشأ بينهم .. بحنانها متخليش اي فجوه تبعدهم.. وبحكمتها بيتها دايماً جنه.

وللحديث بقيه أيها الزوج الصالح.. 

قد يعجبك ايضآ
اترك رد

لن يتم نشر عنوان بريدك الإلكتروني.