في انتظار الحلم_بقلم: رانيا كمال العربى
في انتظار الحلم_بقلم: رانيا كمال العربى
ليه الانسان لما بيستنى حاجة ما بتجيش.؟..
لازم الواحد يعمل أنه مطنش
ومش مهتم ولا مستنى على نار
وهيا هتجيله لغاية عنده
والواحد اللى بيكون عايز حاجة بجد
ونيته فعلا خير
ربنا بيديله على قد نيته الحلوة
وبيديله الحاجة دى
لكن مش معنى أن الواحد ما يستناش
انه يهمل اللى عايزه لاء طبعا
لازم يسعى ويشتغل ويدعى
ربنا ويتوكل عليه
وما يفكرش فى الحاجة دى
لكن تبقى جوة قلبه متمكنة منه
بس من غير ما تعمله تفكير سلبى
أو ياس أو إحباط
يعنى يتمناها من غير ما يستناها
ولو كانت جاية له فعلا
ومن حقه ومكتوبه له
هتجيله لغاية عنده
ولو كانت من نصيب حد تانى
هتروح للشخص التانى
لكن ما تزعلش لأن أكيد
فيه حاجات تانية هتجيلك
والحاجات دى هيا اللى مستنياك
مستنية انها تجيلك
لكن لما تجيلك ما تبقاش تنسى
أنك تحمد ربنا عليها…
فيه مثل إيطالي بيقول
اللي يقف قدام المكرونة متستواش
وبالمصري اللي يقف قدام
الميه متغليش!!
في انتظار الحلم_بقلم: رانيا كمال العربى
فيه واحد كان كاتب تعريف حلو أوي
الصبر (هو فن العثور علي شئ اخر تقوم به)
يعني تشغل نفسك بحاجة تانيه
ومتبقاش مركز زيادة مع الحاجة الأساسية
اللي انت مستنيها لان طول ما أنت مركز
زيادة هتحس بطول المدة
اللى أنت أستنيت فيها
وهتحس بقلة الصبر
(خليها تيجي براحتها)
وأشغل نفسك بحاجة غيرها
وطول ما أنت مشغول
بحاجه تانيه مش هتحس
بطول مدة الصبر..
وتخلي الحاجة تاخد وقتها
الطبيعي علي ما تجيلك …
أصل فيه حاجات
ربنا بيديها لنا
من غير ما نتمناها
يعنى بتجيلنا قبل ما نفكر فيها
أو بنتولد نلاقيها فعلا
عندنا يعنى ما تعبناش فيها
ودى لازم نشكر ربنا عليها
وحاجات لازم نطلبها من ربنا
عشان يديها لنا نطلبها بالدعاء
المستمر والالحاح
ودى لازم نشكر ربنا عليها
لما يستجيب ويديها لنا
فيه حاجات بقى بنطلبها
لكن مش بتجيلنا
لانها بتكون مش من نصيبنا
ولازم برضه نشكر ربنا عليها
لانها اكيد مش الخير لينا ..
وعلى فكرة مدام أحنا مستنين
حاجة معينة يبقى آكيد
الحاجة دى هتيجى
(أصل ماينفعش تستنى حد مش جاى أصلا)
لكن أنت مستني حلمك
عشان أنت واخد معاه معاد …
ممكن تكون مش عارف الميعاد
أمتى ولا فين..
لكن فى الاخر أنت مستنى
ربنا يقرب لك البعيد..
ولغاية ما الحلم يوصل بالسلامة
(أصله ممكن على ما يوصل يتكعبل
فى السكة ولا يقع على وشه
ولا حد يعطله فى الطريق)
أوعى بقى تيأس
أو تحس بالملل..
دى خلاص هانت
والحلم على وصول بس
كل الحكاية شوية صبر..
(ممكن تطلب 2 ليمون على مايوصل..)
التعليقات مغلقة.