لا للتحرش

لا للتحرش…

كتبت : رشا صبري
الكاتبه والمحاميه بقضايا المرأه

التحرش من الجرايم اللي بنتكسف نحكي عنها ناس كتيره بتعتبره عار ومن المحرمات وللاسف اغلبنا اتربي علي كده.. عيب البنت تتكلم ، عيب تواجه وترفض ، وبرغم كل المحظورات دي التحرش جريمة موجودة وبتهدد المجتمع مهما غمضنا عينينا اوتجاهلناه التحرش جريمة بتحصل كل اليوم في الشارع المصري جريمه يعاقب عليها القانون.
تعريف التحرش
هو كل فعل يشعرنا بعدم الأمان والتهديد والخوف وعدم الاحترام وانتهاك لحريه الجسد وحرمته حتي لو بالنظره أو الكلمة.
أشكال التحرش الجنسي
• النظر بشكل غير لائق علي جسم شخص ما او التركيز علي اعضاء معينة وإطالة النظر.
• . إستخدام تعبيرات بالوش بتحمل تعبيرات جنسيه زي اللحس والغمز وفتح الفم
• البسبسه والتصفير والصراخ والهمس واي صوت له طبيعه جنسية.
• التعليقات اللفظيه علي جسد الشخص او مشيته او عمله او القاء نكت تحمل طابع جنسي.
• التتبع أو الملاحقة وده بمطارده الشخص إما بالمشي او عن طريق سياره إما بشكل متكرر أو مره واحده وانتظار الشخص خارج عمله او سكنه او سيارتة.
• الدعوه المباشره لممارسه الجنس.
• طلب ممارسه الجنس بشكل مباشر أو التخيلات الجنسيه او طلب رقم التليفون او الدعوه علي العشاء او أي اقتراح يتضمن طابع جنسي.
• الإهتمام الغير مرحب بة .. زي الإصرار علي توصيل شخص رغم رفضه او الإلحاح في طلب التعارف او إتصال غير مرحب به او عرض طلب جنسي مقابل إنهاء عمل او تقديم هدايا مرتبطة بإيحاءات جنسية .
• . الصور الجنسيه : عرض صور جنسية إما عن طريق الإنترنت أو بشكل فعلي .
• التحرش عن طريق الإنترنت : بإرسال تعليقات أو صور أو فيديوهات تحمل طابع جنسي أو مسئ أو عن طريق الإيميل أو كافه وسائل التواصل الاجتماعي.
• المكالمات الهاتفية أو الرسائل النصية اللي طابعها جنسي او محتواها طلبات جنسية.
• اللمس بكل اشكالة زي التحسس أو الحك أو القرب الزائد أو الامساك أو الشد وأي نوع من الإشارات الجنسية الغير مرحب بيها.
• التعري : إظهار عوره شخص وأجزاء من جسده أو الاستمناء قدام شخص بشكل غير مرغوب فية.
• التهديد إما بالتحرش أو بالاغتصاب أو أي عنف جسدي ده كمان يعتبر تحرش.
• التحرش الجنسي الجماعي مش أي فعل من اللي ذكرتهم دول بيقوم بيه مجموعة من الاشخاص تجاه شخص او مجموعة.
التحرش جريمه بتحصل في الاماكن العامة والخاصة في الشوارع وأماكن العمل بيحصل في الجامعه والمدرسه بيحصل في البيت وعند القرايب عن طريق الانترنت او التليفون وإنتي لوحدك أو مع أهلك وصحابك.

مين هو الشخص المتحرش ؟؟
المتحرش ممكن يكون شخص غريب عنك تماماً أو رئيسك في العمل أو زميلك أو قريب ليكي
المتحرش ممكن يكون أي شخص ممكن يكون عميل ممكن يكون موظف للأسف ممكن يكون أي حد سواء معروف ليكي او غريب.

 نقاط هامة :
• التحرش الجنسي جريمة مش مجرد حدث عادي لازم نظره المجتمع تتغير.
• المتحرش ملوش حق يقرر إذا كان اللي عمله تحرش او لاء لأن القانون واضح
التحرش الجنسي مش غلطتك مهما كان لبسك او فعلك.
• التحرش ده إختيار المتحرش وبإرادته اعتدي علي حريتك ومفيش إي عذر يبرر تصرفة ولايمكن نسيب الفاعل الأصلي ونوجه اللوم للمجني علية عشان كده انتي غير مسئوله ولا بشكل جزئي أو كلي عن الجريمه دي.

تعملي إيه لو اتعرضتي للتحرش الجنسي؟؟
لو إتعرضتي للتحرش الجنسي في الشارع من شخص مجهول هتحاولي تستغيثي بالناس عشان ميسمحوش للمجرم يهرب وهتاخدي شهود معاكي وتروحي لقسم الشرطة تقدمي بلاغ وتاخدي رقم بالمحضر وتتابعية.
أما لو تعرضتي ع السوشيال ميديا هتاخدي كل الرسائل دي او الصور المرسلة وإسم الأكاونت وتروحي مباحث الانترنت تبلغي او إتصلي بالخط الساخن التابع ليهم 108 وهما هيعرفوكي تعملي ايه ؟؟ وتقدري عن طريق التليفون هتتواصلي مع مباحث الاتصالات ودي ارقامهم.
خصصت مباحث التليفونات للإبلاغ عن الشكاوي والمضايقات والمعاكسة:
25762846 /02-25771755 / 02 -02/ 25760502

تعملي ايه لو اتعرضتي للتحرش في العمل؟؟
-اطلبي من المتحرش بشكل حسم يوقف مضايقاتة وخليكي شجاعة ومتبينيش أي خوف مهما كانت سلطته وده لأن المتحرش بيدور ع الشخصيات الضعيفة وبتكون فريسه سهله ليه.
-إبتدي إكتبي كل التصرفات دي عشان لما تقدمي شكوي وخدي اي أدله تدعمك وياريت لو كمان شهود.
-هدديه بشكل مباشر انك هتقدمي شكوي في حقه في إداره المؤسسه اللي انتم تبعها أو هتقدمي البلاغ في الشرطه مباشرة .
-دافعي عن نفسك بكل قوتك حتي لو اضطريتي تستخدمي قوتك الجسدية واصرخي واستعيني بالناس تساعدك وافضحي المتحرش ده.
-إتكلمي مع زمايلك وزميلاتك علي اللي حصل معاكي وربما تكتشفي ان المجرم ده له سوابق مع غيرك ويتم فضحه وده ممكن يفيدك في شكوتك ضده.
الخلاصة متسكتيش عن حقك وقاومي ودافعي عن نفسك بثبات وقوه ولازم تعرفي إان ضعفك هيقوي المتحرش وهيسمحلة يأذي غيرك وغيرك.

إذاي تعملي محضر تحرش ؟
1- هتحاولي تمسكي المتحرش لوحدك او بمساعده الناس وهتطلبي من الناس اللي حواليكي يشهدو معاكي ع الواقعة.
2- هتروحي اقرب قسم شرطه ليكي وهتطلبي من الظابط يعمل محضر تحرش ضد الشخص اللي تحرش بيكي في الطريق العام .
3- هيتم التحقيق معاكي وسؤالك عن إسمك وإثبات شخصيتك ومحل إقامتك وإذا كنتي مسكتي المتحرش أو لاء وعن مكان المتحرش وعن الشهود اللي شافو الواقعه وهيتم سؤالك إزاي حصلت وفين بالظبط .
4 – هيتم استجواب الشهود علي الواقعه عن إسمهم وعمرهم محل اقامتهم إيه علاقتهم بالمتحرش وكان إيه رد فعلهم ؟ وكانو فين وقت الواقعه وشافو ايه بالظبط؟ .
5- فى حالة الإمساك بالمتحرش: سیتم سؤاله عن اسمه، عمره، مهنته، محل إقامته، سبب تواجده فى مكان وقوع الحادث، هل یعرف المجنى علیها، أورآها من قبل؟، بمعنى أن یتم استجواب المتحرش، وفى حالة عدم الإمساك بالمتحرش، سیتم سؤالك هل تعرفى الجانى من قبل، وهل یمكنك الإدلاء بالمعلومات عن أوصاف الجانى او عن طريق شهود العیان، وسیتم تحریرالمحضر وغلقه، یقید برقم إدارى، ستحتاجي إلیه ا للسؤال عن القرار النهائى الصادر عن النیابة التابع لها قسم الشرطة، وفى حالة التعرف على الجانى من المحضر أو التحقیق سیتم تسجیل القضیة، وفى حالة صعوبه ذلك يحفظ المحضر.
6 – – یقید المحضر برقم أحوال حتى یتم استجواب المتحرش.
7- سيتم تحويلك انتي والجانى والشهود للنیابة، للتحقیق معاكم ، وسماع شهادة الشهود، مع مندوب من القسم برفقته أصل المحضر.
8- توجه تهمة التحرش إلى الجانى ویحجز، وتحدد جلسة لعرض المتهم أمام القضاء وإدانته بالعقوبة المناسبة التى ینص علیها القانون.

العقوبه القانونيه للتحرش في القانون المصري
1- المادة 306 مكرر (أ) تنص على”يعاقب المتهم فيهل بالحبس مدة لا تقل عن ستة أشهر وبغرامة لا تقل عن ثلاثة آلاف جنيه، ولا تزيد على خمسة آلاف جنيه أو بإحدى هاتين العقوبتين كل من تعرض للغير فى مكان عام أو خاص أو مطروق بإتيان أمور أو إيحاءات أو تلميحات جنسية أو إباحية سواء بالإشارة أو بالقول أو بالفعل بأية وسيلة بما في ذلك وسائل الاتصالات السلكية أو اللاسلكية.
2- تكون العقوبة الحبس مدة لا تقل عن الحبس سنة وبغرامة لا تقل عن خمسة آلاف جنيه ولا تزيد على عشرة آلاف جنيها وبإحدى هاتين العقوبتين إذا تكرر الفعل من الجاني من خلال الملاحقة والتتبع للمجنى عليه.
3- في حالة العودة تضاعف عقوبتا الحبس والغرامة في حديهما الأدنى والأقصى.
4- تنص المادة 306 مكرر (ب): يعد تحرشا جنسيا إذا ارتكبت الجريمة المنصوص عليها في المادة 306 مكرر (أ) من هذا القانون بقصد حصول الجانى من المجنى عليه على منفعة ذات طبيعة جنسية، ويعاقب الجاني بالحبس مدة لا تقل عن سنة وبغرامة لا تقل عن عشرة آلاف جنيه ولا تزيد على عشرين ألف جنيه أو بإحدى هاتين العقوبتين.
5- إذا كان الجانى ممن نص عليهم في الفقرة الثانية من المادة (267) من هذا القانون أو كانت له سلطة وظيفية أو أسرية أو دراسية على المجني عليه أو مارس عليه أي ضغط تسمح له الظروف بممارسته عليه أو ارتكبت الجريمة من شخصين فأكثر أو كان أحدهم على الأقل يحمل سلاًحا تكون العقوبة الحبس مدة لا تقل عن سنتين ولا تجاوز خمس سنين والغرامة لا تقل عن عشرين ألف جنيه ولا تزيد على خمسين ألف جنية.