“مراد فكري ” لـ أسرار المشاهير 2018 كان فيها حاجات حلوة كتير والتابلت و 3 ورقات الجديد في 2019
إعداد /دعاء سنبل
اشتهر بتقديم دور الشاب المنحرف أو الفكاهي ابن البلد والمناطق الشعبية، حيث لفت الأنظار بدوره في مسلسل “ابن حلال” ، وفيلم “الألماني” ،يعتبر دوره في مسلسل “ابن حلال” عام 2014، حيث قام بشخصية “سيد صرصار”، نقلة في مشواره الفني، وجاء ترشيحه للدور من خلال الفنان محمد رمضان، الذي رشحه للمخرج إبراهيم فخر، هو الشاب الصاعد “مراد فكري صادق”، تخرج الألسن و يتقن ثلاث لغات، ودرس في مرحلة التعليم الجامعي بالمعهد العالي للسينما .
ممكن نعرف من حضرتك أيه الحاجة الحلوة اللي حصلتلك في 2018 ، وايه الحاجة الوحشة اللي حصلتلك متتمناش تحصل لك تاني في 2019 ؟
الحمد لله كان في حاجات كتير اوى حلوة في 2018 منهم دخولي فيلم اللعبة الأخيرة ، ويعتبر ده تغير لوني وبحضر لحاجة تانية مختلفة عن أدواري أقدر أقول اني 2018 دخلت في مرحلة ثانية وغيرت لوني ودخلت مسلسل إذاعي مع نضال الشافعي ومنة فضالي وانا كنت بعيد عن الإذاعة من حوالي 4 أو 5 سنين ، والجديد كمان كان فيلم الخروج عن النص وتكريمي من المركز الكاثوليكي عن شخصية سيد مملكة ، وفيلم قلب اسود وأكيد من الحاجات الحلوة ان بنتي نور عيني بعد أبويا وأمي ” داليدا” تمت سنة وطبعاً في ناس سبتنا و قبالنا ناس .
الحاجة الوحشة اللي مش حابب تحصل في في 2019 اني ابعد عن شاشة التلفزيون لأني بحبها جداً ، وبسعى ان يكون الجديد ليه حاجة مختلفة وجديدة إن شاء الله.
ومن اسؤ كمان ماحصلي في 2018 أني فقدت صديق عمري “ماهر عصام” ودي كانت بالنسبالي صدمة .
ومن الحاجات اللي ضايقتني إني مركبتش مسرح مع محمد رمضان في مسرحية” أهلاً رمضان “بس محصلش نصيب بسبب اختيارات أشخاص إدارية وكنت متفق انا ومحمد رمضان هنكون مع بعض.
و2018 كشفت حقائق ناس كتير اووي كنت فاكرهم كويسين واتمنى اني ابدء حياة جديدة ومستقرة في 2019 .
وكمان نسيت اقول بجد من الحاجات اللي بجد ضايقتني وجود شخص تافه وحقير بقالي 3شهور بعاني لأنه استخدم اسمي وصوري وبيعمل اكونتات فيك ، وانا اخذت احتياطي الامنية ،لكن بحظر الناس منه لأنه بيشتم ناس ويكلم ناس بأسمي وبشكر من خلالك مباحث الأنترنت بقلهم شكرا على اهتمامهم وأنهم بيأمنونا.
إيه اللي بتتمناه في 2019 على مستوى العمل والمستوى والاجتماعي ؟
اتمنى كل فنان وفنان وكل شاب يحقق حلمه واللي نفسه في حاجة يحققها ، وينول اللي في باله واللي هو عايزه ، لكل مجتهد نصيب ، واتمنى تمون 2019 سنة خير على كل حبايبي في الوسط الفني وخارجه .
ايه الجديد بالنسبة ل ” مراد فكري ” في 2019 ؟
الجديد بأذن الله بجهز فيلم اسمه 3ورقات مدته 30 دقيقة إنتاج شركة رسالة وإخراج هشام زيتون وبنجهز علشان يدخل مهرجان الجونة و إسكندرية الجايين .
وفي مسلسل التابلت هرجع به للدراما في 2019 مع نرمين ماهر ومدحت تيخا وايمن قنديل وآخرين .
الفنان الشاب ” مراد فكري ” تحب تقول ايه لجمهورك بمناسبة السنة الجديدة ؟
اقولهم كل سنة وانتم طيبين لكل المصريين مسلمين وأقباط ،وكل سنة واهلي وحبايبي كلهم بخير ، كل سنة ونجاحي بيكبر يوم بعد يوم وتصرفاتي بتتغير للأحسن والأنضج ، وكل سنة وانتم طيبين جميعاً وبخير .
