أحدث أخبار الفن والرياضة والثقافة والمرأة والمجتمع والمشاهير في كل المجالات

مروة نصر: شيرين كل حياتها الفترة الأخيرة استعطاف، والإنسان الذكي ميلطش في الناس عشان يعمل تريند

مروة نصر: شيرين كل حياتها الفترة الأخيرة استعطاف، والإنسان الذكي ميلطش في الناس عشان يعمل تريند

كتبت:أحلام محمود المخزنجي

اثارت تصريحات المطربة مروة نصر ضجة كبيرة، والتي قد كشفت عنها معلقة على النجمة شيرين عبدالوهاب حيث قالت: “هو فيه بينتقدها عملت كل الحاجات اللي متتغفرش، دي لو فنانة شابة عملت الحاجات دي كان زمانها دلوقتي في حته تانيه، لا خلينا فير كتير”.

وتابعت: “يعني شفت فيديو ليها، لا وائل منصور واحنا في الراديو كان بيقول إنها بتقول على اليسا وهي بتغني ماسكة على الناس شيكات، كاتبة على الناس شيكات فقعدت أفكر هو أنتي قاصدة تقولي أن هي صوتها وحش، ولا قصدك ايه ما انا مفهمتش الجملة اليسا دي نجمة كبيرة أوي عشان تبقي فاهمه، وشخصية لطيفة جدًا يعني انا مفيش علاقة بينا بس افتكر شفتها كام مرة في لبنان شخص بيعامل كل الناس بتواضع فوق ما أنتي متخيلة وشخصية ناجحة جدًا، ايه اللي يخليكي تقولي عليها كدا، دي في دولة تانية حتى دي مسلمتش منك”.

وقد اعترضت على وصف شيرين عبدالوهاب لنفسها بأنها صوت مصر، موضحة بأن الأخيرة أخر عمل فني لها كان من قبل زواجها وأنها لا تصلح أن تكون صوت مصر وأن الجمهور هو من يقرر هذا الأمر.

وتحدثت عن ما يحدث مع الفنانة شيرين في الفترة الأخيرة، وتصدر اسمها تريند تويتر ومواقع التواصل الإجتماعي، حيث قالت: “هي كل حياتها الأخيرة دي تقريبًا كلها استعطاف، انا شايفة أن ربنا ادالك حاجه كبيرة أوي مبتجيش إلا كل سنين كتير أنتي أخر واحدة اخذتي دعم من يوم ما طلعتي مع ممدوح موسى اخدتي دعم محدش خده وبقيتي نجمة كبيرة جدًا وعندك الصوت وعندك القبول، وعندك بنتين زي القمر، وعندك كل حاجه”.

وعلقت على وصف شيرين بصوت مصر حيث قالت: “أنتي بتتكلمي صوت مصر من ناحية أحلى صوت ولا من ناحية أقوى نجومية ولا من ناحية أذكى مطربة”

وتابعت مروة نصر في تصريحات لها: “أصلك لو بتتكلمي من ناحية أحلى صوت فهي معرفتش تغني لمحمد الموجي، بدليل أن أحسن واحدة غنت في الحفلة مي فاروق”.

و أضافت: “ولو بتتكلمي عن أقوى صوت في مصر بلا منازع فهو آمال ماهر مبنتكلمش عن المشاكل، ولا عن النجومية واتعملها حفلة صوت مصر في الساحل، زي حفلة أنغام”.

وأوضحت مروة نصر استيائها من أسلوب الفنانة شيرين عبدالوهاب في الفترة الأخيرة حيث قالت: “لو هي ردها عقلاني سوي لكن والله العظيم مثيرة للشفقة، كانت ترد تقول ايه صوت مصر الوحيد صوت أم كلثوم، هو دا الصوت الوحيد اللي يتقال عليه صوت مصر أخلاقيًا تاريخيًا كل حاجه، بتتكلمي عن تاريخ أنغام من قبل شيرين بكتير جدًا”.

وتابعت: “قطعوا اللقب بتاع صوت مصر مفيش واحدة مطلعتش مقالتش انا صوت مصر، فخلاص كل واحدة شايفة إنها صوت مصر تشوف نفسها في صمت أو تخلي جمهورها هو اللي يقول كده”.

وأردفت قائلة: “وبعدين ترجعوا تقولوا معلش أصلها كانت في مصحة أصلها حلقت شعرها، طيب ما انا بنتي بتشوف الحاجات دي بتحبها وممكن تتعلم منها انا بقى استفدت ايه؟ بصوت مصر ؟”.

ثم وجهت نصيحة لشيرين عبدالوهاب، وقالت: “ما أنتي لو حاسه أن أنتي صوت مصر خليكي اد اللقب دا وراعي تصرفاتك عشان خاطر بلدك مش عشان خاطر أي حد ولا عشان خاطر أي حاجه تانيه أنتي نجمة كبيرة وعلى عينا وعلى راسنا وصوت كبير وكل حاجه، بس لازم يكون فيه اتزان”.

واختتمت كلامها موضحة أنها ترى أن سبب السكوت عن أفعال شيرين عبدالوهاب هو أنها نجمة كبيرة ولكن اذا كانت فنانة شابة أن تنال ذلك التعاطف وتلك المعاملة، فقالت: “انا بيصعب عليا لو واحدة صغيرة طلعت قالت ربع كلمة بيكون فيه سلخ وجلد ودي متستحقش، لكن دي مهما تتكلم لا حرام”.

وأضافت: “الإنسان الذكي بيعرف قيمة النعمة اللي ربنا اداهاله ويحافظ عليها وميلطش في الناس عشان يعمل تريند عشان هو عارف أنه من غير الحاجات دي مش هيبقى موجود”.

قد يعجبك ايضآ
اترك رد

لن يتم نشر عنوان بريدك الإلكتروني.