مشاهير اليوتيوب .. اسلام مهدي

= كتب : ابراهيم مرزوق

 = فى هذه الأيام السوشيال ميديا وخصوصاً اليوتيوب أصبح عالماً ملئ بالنجوم والمشاهير وظهرت لهم مئات القنوات التى تضم محتويات مختلفة جذبت انتباه الجميع وأصبح لهؤلاء النجوم ملايين من المتابعين ..

ونحن فى ( أسرار المشاهير ) فكرنا فى هذا الباب لنتعرض فى كل حلقة لنجم من مشاهير اليوتيوب وإلقاء الضوء على قصة نجاحه ورحلة كفاحه وملامح من حياته ليستفيد القارئ من تلك التجربة .. واليوم نلتقي مع النجم ( اسلام مهدي ) ..

= تحدث اسلام لـ ( أسرار المشاهير ) فقال : اسمي اسلام مهدي .. عمري 30 سنة وخريج بكالوريوس نظم معلومات إدارية .. وحالياً اعمل مخلص جمركى فى مطار القاهرة .. هوايتى هى الرياضة بشكل عام وباحب الكورة جداً بشكل خاص وغير الكورة باحب الباسكيت بول وكمان باحب المزيكا وخصوصاً مزيكا التسعينيات متأثر بيها بشكل كبير ..

= بدايتي الحقيقية على اليوتيوب كانت عام 2016 وظهرت بشكل صدفة بحت يوم مباراة للاهلى امام المقاولون وسجلت فيديو لي بشكل غير مهتم تماما ونشرته .. ولقيته فجأة عجب اصحابى القليلين عندى ثم فيديو فى التانى وصلت لعدد متابعين كبير بسبب ربنا ثم بيدج ( الاهلى اليوم ) اللى ساعدتني بشكل كبير جداً فى الوصول للناس لكن انا كنت أنشئت قناتي من سنة 2012 ولكن ماكنتش بنشر عليها فيديوهات وماكنتش متوقع خالص انى هوصل للناس وتعرفنى .. لكن الحمد لله وصلت لانى باعمل الحاجة بحب وبدون تريند او محاولة شهرة .. 

= احلامى انى اكبر فى الميديا مش اكون اعلامى فى التليفزيون لان لو بقيت اعلامى هكون مرغم على العمل حسب فكر القناة يعنى مافيش مساحة حرية انما الميديا فيها حرية كبيرة عن التليفزيون ..

= اغرب طلب من المتابعين ان حد فضل مصمم طوال موسم بالكامل انى اقلع سلسلة كنت لابسها وكل مرة يطلبها بشكل كوميدى لكن الصراحة دى حرية شخصية وأطرف مواقف التصوير لبرنامجي انى دايماً باعمل فواصل وانا باصور لانى احيانا اكح كتير رغم انى غير مدخن ..

= حدث في مرة ان مشجع زمالكاوى زعل مني جداً بسبب تعليقات لي فى فيديوهاتي لكن الحوار خلص وقتها واعتذرت له .. وبيحصل دايما من الزمالكاوية يدخلوا يعاتبونى بشكل ودى وانا دايما أرد بشكل هادى لكن اللى بيدخل يشتم باضطر أرد عليه بنفس الأسلوب تقريباً ..

= مش طموحي تمثيل ممكن إعلانات لو أتيحت وبرضه مش حلمي اكون اعلامى لانى زى ما وضحت ان الإعلام الرياضى مبرمج ومحايد بشكل ممل وانا مش طموحي العمل الاعلامى لكن هدفى الوصل لأكبر عدد متابعين من الميديا لانها  ليها الفضل عليا بعد ربنا ..

= اللى زود عدد المتابعين عندي مش فيديو معين لكن مجموعة فيديوهات لما كنت باتكلم عن صبري رحيل بشكل كوميدى شوية وأكيد الفيديو اللى نقلني جامد هو فيديو دخان الشيشة يوم فوز الاهلى على الترجي التونسي 3 / 1 وكان اشهر أفيه لي فى الوقت ده ( انت تسيبك من إفريقيا وتاخد اللى ) وكنت اقصد ( اللى ) بتاع الشيشة والافيه ده علق جدا مع المتابعين ..

= انا باتكلم عن الاهلى بشكل متخصص .. الاهلى وبس وده الحمد لله شئ بيسعدنى على الرغم من انه محدود المشاهدة لكن انا تفكيرى مش مشاهدات اكتر منه فكرة انا بأحبها وبأهتم بيها ..

= اعتقد متابعة الزمالكاوية مش قوية لكن حتى ولو فيه حد متابعني زملكاوى هيكون واثق انى محايد حتى فى نقد الاهلى وباكون ناشف شوية .. وانا واصحابى مش بنتكلم فى الكورة كتير لأنهم اكيد هيخسروا لو اتكلموا في الكورة معايا خصوصاً لو اهلى وزمالك او حاجة تخص الأهلي ..

= الميديا دى سلاح ذو حدين ممكن النهاردة تكون فوق وبكرة ماحدش يعرفك وممكن يتقفلك أكونت او قناة الناس تنساك .. الميديا فى مصر بتحب التريند والتجديد والناس بوجه عام بتحب التغيير فى كل شئ ولكن انا طريقي واحد هو الأهلي وبدون مقابل وبدون بحث عن شهرة .. دى أهم حاجة نفسى الناس تعرفها لان هى دى نيتى وربنا اللى يعلم انى حرفياً لا ابحث عن شهرة إعلامية ..