أحدث أخبار الفن والرياضة والثقافة والمرأة والمجتمع والمشاهير في كل المجالات

مشاهير اليوتيوب .. عبد الرحمن الصافي

= كتب : ابراهيم مرزوق

= فى هذه الأيام السوشيال ميديا وخصوصاً اليوتيوب أصبح عالماً ملئ بالنجوم والمشاهير وظهرت لهم مئات القنوات التى تضم محتويات مختلفة جذبت انتباه الجميع وأصبح لهؤلاء النجوم ملايين من المتابعين ..

ونحن فى ( أسرار المشاهير ) فكرنا فى هذا الباب لنتعرض فى كل حلقة لنجم من مشاهير اليوتيوب وإلقاء الضوء على قصة نجاحه ورحلة كفاحه وملامح من حياته ليستفيد القارئ من تلك التجربة .. واليوم نلتقي مع النجم ( عبد الرحمن الصافي ) ..

1

= تحدث عبد الرحمن لـ ( أسرار المشاهير ) فقال : اسمي عبد الرحمن الصافي .. اسم الشهرة مذيع مصر .. عمري 27 سنة خريج آداب إعلام جامعة دمنهور .. عندي مطبعة كشغل أساسي بجانب قناة مذيع مصر على اليوتيوب .. محتوي قناتي بيتكلم عن التريندات والأخبار علي اليوتيوب ..

2

= بدأت يوتيوب بالصدفة .. وانا أصلاً كنت شغال بقالي 8 سنين فى مجال السوشيال ميديا وباعمل فيديوهات على الفيس بوك واشتغلت فترة فى الصحافة فى جريدة البوابة نيوز وموقع دوت مصر .. ودخلت اليوم السابع وعملت كذا تقرير واشتغلت في أماكن اخري كتير .. الموضوع جه بالصدفة كنت باطور من المحتوى بتاعى على الفيس بوك نزلت تقرير وسبته على قناة كنت عاملها من سنة 2016 .. لقيته جاب مشاهدات كويسة .. بدأت احس انى لازم اهتم باليوتيوب اكتر من كده .. ناس كتير كانت بتنصحنى باليوتيوب بس انا كنت حابب الفيس بوك اكتر ..

3

= من واقع التجارب اللى عدت عليا فى شغلى أو حياتى عموماً .. انا باعمل اللى عليا وبالتالى بنجح حتى لو النجاح ده عبارة عن خبرة باعتبره نجاح .. يعنى لو عملت تجربة وفشلت انى أكمل فيها أكيد اخدت خبرة واستفدت حاجة .. وأكيد كل تجربة بادخلها أو حاجة باعملها بابقى متأكد 100 ٪ انى كده كده هنجح .. وكنت باخد ده كحافز ليا .. لما دخلت اليوتيوب ماكانش الدافع ليا ربح .. كنت واخده كتدريب انى اشتغل قدام الكاميرا لانى بأحب ده وكنت واخده كحد أدنى انى اوصل لده .. وربنا كرم ووصلت لمكانة كويسة والموضوع بدأ واحدة واحدة ..

4

= حلمي انى ابقى مذيع فى التليفزيون .. ومستني فرصة بإذن الله تكون كويسة .. وده حلمي الأساسي .. اليوتيوب بالنسبة لى نافذة انى أكون مذيع فى التليفزيون .. وانا كنت داخل اليوتيوب كأداة تدريب ليا انى اصقل الجزء الموجود عندى وانى اعرف اقدم أو اعرف أتكلم .. والحمد لله قدرت انجح فى ده فى وقت قليل ..

5

= بتجيلى طلبات كتير غريبة .. أوقات بالاقى ناس لو انا عملت حلقة معينة على فنان مثلا بتطلب رقمه وعايزة توصل له .. وعايزينك ترد عليهم فى ساعتها .. وناس تتصل الفجر يبقى فيه مواقف بيحكيلك أو يشكيلك كده من غير حاجة .. بيتكرر كتير موضوع أن الناس تتصل فى اى وقت .. وممكن تلاقى حد بيتصل عليك فيديو فى اى وقت والمفروض ترد ولا هتبقى مغرور ومتكبر .. بس لازم تحط نفسك مكان الناس وبالتالي هتعرف تتعامل معاهم ..

6

= مواقف كتير بتحصل لما كنت باعمل تقارير فى الشارع .. لانى اشتغلت فترة طويلة فيها قبل ما أركز فى اليوتيوب عملت حوالى 70 تقرير على نفس نظام مذيع الشارع .. وكانت كلها مواقف غريبة جدا بس مش متذكر موقف بحد ذاته ..

= للأسف أحنا ماعندناش ثقافة الانتقاد أو أن حد ينتقد حد أصلاً .. الثقافة دى مش موجودة فى مصر .. انت انتقدت حد يبقى انت عدو ليا تبقى انت بتشتمنى .. انا لما بانتقد حد بكل احترام بالاقى ردود أفعال محترمة ساعات .. يعنى مرة انتقدت بلال عزت وتواصلت معاه لقيته شخص لطيف فيما عدا ذلك الناس عدوانية جدا .. يعنى انا باكلمك حالياً وفيه مشكلة مع يوتيوبر اسمها لولا فانى يوميات يعنى .. هى من أكبر القنوات على اليوتيوب والفيس بوك والتيك توك كان بدأت من تيك توك وانا باقولها انك غلطتي انك بتدافعي عن حنين حسام فزعلت مني جداً ..

7

= فيه ناس داخلين عايزين يقفلوا الصفحة عايزين يأذونى كل ده من غير ما أضر حد ومن غير ما أغلط ومن غير ما أقول كلمة وحشة لحد .. الموضوع كبير وتفاصيله كتيرة .. وللأسف الثقافة دى مش موجودة عندنا واننا نتناقش حتي لو نختلف يبقي باحترام .. ودى تعتبر من سلبيات اليوتيوب فى مصر .. والموضوع بيبقى أصعب لو فيه شركات ماسكة قنوات معينة تجيب مخالفات وتغلق قنواتك على اليوتيوب ..

8

= أحلامي مابتخلصش ودايما باجدد طموحي .. أكون مذيع أولاً وبعدها بأحب التمثيل وعلي فكرة اشتغلت مخرج مسرحي في 3 عروض ومثلت مسرح وأفلام قصيرة لكن حالياً مركز في حلمي كمذيع أولاً ثم التمثيل .. وأحلامي في اليوتيوب انا باعيشها حالياً وباحاول أجدد وأزود طموحي ان أكبر واشتغل اكتر علي اليوتيوب اللي هو بالمناسبة أفضل نافذة للفيديو علي مستوى العالم وحقق لناس كتير شهرة ونجاح كبير ..

9

= الفيديوهات اللي كنت باوصل فيها لمصدر التريند زي فيديو خال محمد صلاح يوم أزمته الشهيرة وصورت معاه فرق معايا .. وكمان تريند مصطفى ابو تورتة لما صورت معاه وكمان طبعا قضية الشهيد محمود البنا اللي اكتر حاجة فرقت في معرفة الناس بشغلي لان كنت علي تواصل دائم مع أهله وصورت حلقات كتير مع والده ووالدته .. وكمان حلقاتي مع كابتن رضا عبد العال في الوقت اللي كان موجود تريند كان بيطلع معايا علي طول في حلقات لحد ما نصحته يعمل قناة علي اليوتيوب وفعلاً عملها واستقل بعدها بشغله ..

= نصيحتي للنجاح في اليوتيوب هي الاستمرار وانك تشتغل صح ماتدخلش اليوتيوب غير لما تكون عارف كل حاجة عنه وتلغي اليأس من قاموس حياتك واجتهد انك تميز نفسك وشغلك عن كل اللي حواليك .. وقتها النجاح إجباري هيجيلك لحد عندك ..

 

قد يعجبك ايضآ
اترك رد

لن يتم نشر عنوان بريدك الإلكتروني.