مشاهير اليوتيوب .. محمد ابراهيم

= كتب : ابراهيم مرزوق

= فى هذه الأيام السوشيال ميديا وخصوصاً اليوتيوب أصبح عالماً ملئ بالنجوم والمشاهير وظهرت لهم مئات القنوات التى تضم محتويات مختلفة جذبت انتباه الجميع وأصبح لهؤلاء النجوم ملايين من المتابعين ..

ونحن فى ( أسرار المشاهير ) فكرنا فى هذا الباب لنتعرض فى كل حلقة لنجم من مشاهير اليوتيوب وإلقاء الضوء على قصة نجاحه ورحلة كفاحه وملامح من حياته ليستفيد القارئ من تلك التجربة .. واليوم نلتقي مع النجم ( محمد ابراهيم ) ..

= محمد ابراهيم شاب هادئ يتكلم ببساطة وعفوية لذلك يصل الى القلوب سريعاً .. يقدم محتوى ريأكت على فيديوهات التيك توك بشكل كوميدى ساخر .. كما يقوم بنقد بعض السلبيات الموجودة من حولنا بأسلوب كوميدى راقي .. له قناتين على اليوتيوب الاولى تخطت الربع مليون متابع والثانية اقتربت من 100 الف متابع ..

= تحدث محمد ابراهيم لـ ( أسرار المشاهير ) فقال : اسمي محمد إبراهيم محمد رمضان واسم الشهرة محمد ابراهيم ادرس نظم ومعلومات وهوايتي المفضلة تصوير الفيديوهات على اليوتيوب .

= في بدايتي كنت باعمل فيديوهات على الفيس بوك وماكنش فيه ناس بتهتم بيها .. واحد من أصدقائي قال لى انشر على اليوتيوب هتلاقى جمهور وناس تشوف الفيديوهات بتاعتك .. وعملت الفيديوهات ونزلتها على اليوتيوب وفعلا ماكنتش متوقع النجاح اللى انا وصلت له ده .. كنت الأول أخرى صحابى يتفرجوا على الفيديو بعد كده لقيت ناس كتير بتتفرج وناس كمان بتشير الفيديوهات وبدأت فى الانتشار بشكل كبير ..

= اللى كان بيشجعنى دايما هم اصحابى .. وكانوا دايما يقولوا الفيديوهات جميلة وكويسة .. وطور من نفسك فتقدر تخلى الناس اللى تتفرج عليك اكتر .. وانا أثق فى كلامهم وفعلا بدأت أطور من نفسى خطوة خطوة ..

= الخطوات اللى أنا مشيتها لتحقيق أحلامي كتيرة أولها انى حابب أكمل دراستى وفعلا انا باجتهد لتحقيق الحلم ده عشان أتخرج .. وباحلم انى أسافر والموضوع ده فى بالى دايما .. ولو فضلت فى مصر اشتغل شغلانة كويسة بمرتب كويس اقدر أعيش به أنا والأسرة ..

= أغرب الطلبات اللى بلاقيها من المتابعين أنى أعمل فيديو على شخص أو حاجة معينة وألاقيهم طالبينها  تاني وتالت ورابع وخامس .. طب أنا عايز أنوع لان فى الحقيقة دى حاجة صعبة جدا .. انا ممكن اعمل فيديو واحد او اتنين عن شخص .. لكن اكتر من كده ح أجيب كلام عن الشخص ده منين ..  

= أطرف حاجة بتحصل لى أثناء التصوير انى بالاقى ذبابة بتطلع لى من اللا شئ تنزل تقف على شعري او على ايدى او على المايك وحقيقي بابقي مش عارف أصور خالص .. اما أصعب المواقف اللى اتعرضتلها فى اليوتيوب انى ابقى متعود على عدد مشاهدات او كومنتات معين واعرض الفيديو وماحدش يشوفه ابقى تعبت فيه وما اتشافش ..

= عملت فيديو عن شخص اسمه الشيمى وكلمني قال لى يامحمد الفيديو جميل وكويس انك ما غلطتش او قولت كلام جارح لان فيه ناس بتقول ألفاظ خارجة كتير .. أنا كان نفسى نتعرف وكويس إننا اتعرفنا .. وباشجعك انك تكمل والفيديو كويس ..

= فى المستقبل نفسى يبقى لي شغلي الخاص بي يعنى اشتغل بشهادتي وفى نفس الوقت انا ميال للشهرة والإعلانات وكده من اليوتيبوب ..

= الفيديو اللى عملته وخلاني اعمل فيديوهاتي على نفس الموضوع .. كنت بانتقد محمد رمضان على أغنية كان عاملها وكنت باخد انتقدت من محبي محمد رمضان بس انا كنت واثق فى رأيى .. كانت أغنية الملك على ما أتذكر .. بس الفيديو ده دلوقتى أتمسح ..

= الافيهات اللى فى فيديوهاتى دي بتيجى تلقائي .. انا مابقاش حاطط فى دماغي انى اطلع أقول كذا وكذا هى الافيهات بتيجى لوحدها … وانا باتفرج على الفيديو أقول مثلاً ايه ياست ايه العك ده .. حاجات انا مش حافظها وبتيجى حسب الفيديو اللى باعلق عليه ..

= نفسي كل الناس تعرف ان اليوتيوبرز بتبقي طالعة ساعات بتهزر .. ونصيحة لأى حد متابعنى خد كلامي على انه هزار او دعابة .. أحنا كلنا أخوات والمفروض مانزعلش من بعض ..