مصطفى زيكو لاعب حرس الحدود يفتح قلبه لأسرار المشاهير و يرد على خبر إنتقاله للأهلي
مصطفى زيكو لاعب حرس الحدود يفتح قلبه لأسرار المشاهير و يرد على خبر إنتقاله للأهلي
حوار: آيه حجاج
فتح “مصطفى زيكو” لاعب الفريق الأول لكرة القدم بنادي حرس الحدود قلبه للحديث مع جريدة “أسرار المشاهير”، عن عدة محاور رئيسية في حياته أهمها تعاقده مع النادي الأهلي.
و كانت انتشرت الأحاديث و الأقاويل حول إنتهاء تعاقد زيكو مع النادي الأهلي ، في الصيف المقبل و لمدة 4 مواسم ، ليوضح لنا اللاعب من خلال الحوار موقفه من ذلك.
و جاء الحوار مع زيكو كالتالي:-
س1/ كيف كانت بدايتك في كرة القدم ، و من أين بدأت؟
ج1/ أنا من ناشئين جمهوريه شبين اتصعدت مع الفريق الأول و أنا عندى ١٥ سنه ، و لعبت أول مباراة رسميًا و انا عندى ١٦ سنه ، و مشيت من شبين إلى الحرس في موسم ٢٠١٩ لعبت معاهم سنتين في الدرجه التانيه و بعدين صعدت معاهم.
س2/ فريق كنت تحلم بالإنضمام إليه منذ الصغر؟
ج2/ مش فريق معين بس اكيد بحلم إني ألعب في أحد الانديه الكبيره في مصر ، و الإحتراف طبعاً.
س3/ حدثنا عن انضمامك للمنتخب الوطني المصري للمرة الأولى؟
ج3/ كنت مبسوط جداً طبعاً و ادتني دفعه كبيره في مشوارى في الدورى الممتاز.
س4/ طموحاتك الفترة المقبلة ماذا عن منتخب مصر هل حدثك أحد للانضمام لمعسكر الفراعنة مرة أخرى؟
ج4/ طموحى ملوش حدود لسه معملتش حاجه ، و إن شاء الله أوصل إلى أبعد حاجه محدش كلمنى في المنتخب عن الإنضمام تانى، أنا بجتهد و سايب كل حاجه على ربنا طبعاً.
س5/ حاليًا حرس الحدود في المراكز الأخيرة ، هل قادر الحرس على تغير الوضع و الابتعاد عن مناطق الهبوط؟
ج5/ أكيد طبعاً إحنا في موقف صعب بس الفرق كلها قريبه من بعض ، إن شاء الله إحنا مركزين في الفتره الجايه إن إحنا نقدر نطلع النادي من إلى هو فيه و نرجعه إلى مكانته الطبيعيه إن شاء الله.
س6/ رأيك في أداء التحكيم وإثارة الجدل حول إتحاد الكرة؟
ج6/ أنا مبحبش اتكلم عن الحكام دى كوره و احنا بشر و كلنا بنغلط.
س7/ ردك و حقيقة المفاوضات مع الأهلي ، و هل فعلاً مضيت 4 مواسم للأهلي مثلما ما قال الناقد الرياضي محمد مراد أم لا؟
ج7/ مش حابب أتكلم ف حاجه زى دى دلوقتي كل حاجه و وقتها إن شاء الله.
س8/ من وجهة نظرك شايف مين أقرب فريق أنه يفوز بالدوري هذا الموسم؟
ج8/ الدورى صعب طبعاً و محدش يقدر يقول مين البطل دلوقتى لسه بدرى و في تغيرات كتير في ترتيب الدوري.
س9/ من هو قدوتك محليًا و عالميًا؟
ج9/ صلاح طبعاً.
س10/ مين فريقك المفضل ضمن الخمس دوريات الكبرى؟
ج10/ ريال مدريد.