نجوم الابداع .. الفنان احمد حسين

= كتب : ابراهيم مرزوق

 = الإبداع له فروع كثيرة ومتعددة والمبدعين يمتلكون لمسات فنية سحرية وأسلوب خاص وإبداعات رائعة في كافة المجالات .. فقد استطاعوا فرض أسلوبهم المميز ولاقوا نجاحاً كبيراً بشهادة الجميع ..

ونحن فى ( أسرار المشاهير ) فكرنا فى هذا الباب لنتعرض فى كل حلقة لنجم من نجوم الإبداع وإلقاء الضوء على قصة نجاحه ورحلة كفاحه وملامح من حياته ليستفيد القارئ من تلك التجربة .. واليوم نلتقي مع الفنان ( احمد حسين ) ..

= تحدث احمد لـ ( أسرار المشاهير ) فقال : اسمي احمد حسين وعمري 22 سنة .. حالياً ادرس في آداب فلسفة جامعة القاهرة .. والرسم بالنسبة لي من الحاجات اللي بتخليني اخرج من اي مود وحش .. ومن صغري كان نفسي أوي اتعلم رسم .. واشتغلت جرافيك ديزاينر ..

 

= بدايتي مع الرسم كانت 2013 .. بدأت ارسم فيكتور وطبعا كان الموضوع كان لسه جديد مش زي دلوقتي .. كنت باشوف انبهار الناس ودا كان بيبسطني جدا رغم ان مش ده الأداء اللي كان نفسي أوصل له .. وكان تشجيع الناس ليا في الجروبات والواتساب وزمايلي وأصحابي .. وكنت باشوفهم مبهورين ودي كانت حاجة بتحسسني اني باعمل حاجة وده الشئ اللي خلاني أطور من نفسي ..

= المشكلة عندي اني كنت بافصل فجأة لما باحس اني مش باضيف حاجة لشغلي .. وبارجع وانا عامل إضافات احسن .. وطبعا الدراسة والشغل كانوا مخليني ماعنديش اي وقت اقعد في رسمة من 5 إلي 7 ساعات ..

= انا نفسي جدا أتشاف وأتميز بالشغل اللي انا عامله .. والخطوات اني اشتغل واسعي اكتر وأحاول أضيف حاجة في كل مرة .. وباعمل أسلوب لرسمي بحيث اي حد من متابعيني بمجرد ما يشوف الصورة يعرف ان ده شغلي .. لحد دلوقتي دي المرحلة اللي انا شغال عليها ..

= اغرب حاجه أتطلبت من المتابعين .. كان حد بيقول لي عايزك ترسمني قولت له تمام تحت امرك الأسعار والمقاسات كذا .. قال لي لا انا عايزك ترسمني ببلاش .. مش عايز خلاص براحتك ..

= أطرف المواقف .. اني ابقي بارسم احمد كامل مثلا حد يقول لي نبيلة عبيد دي .. وأصعب وقت لما باحس ان ماحدش انبهر باللي عملته .. والمواقف السعيدة لما الشخصيات المشهورة اللي انا بارسمهم بيدعموني وبينزلوا شغلي وبيشكروني بجد بأبقي مبسوط جدا ..

= حصل كتير ان حد يتواصل معايا ويشكرني .. وكتير من المشاهير طلبوا مني رسمهم  .. لكن اغلب  الشكر بيبقي في بوست او في كومنت كده يعني .. والشخصيات اللي بتيجي في دماغي بارسمها وببقي أكيد بأحبها جدا وباكون مبسوط جدا وانا شغال عليهم .. ونفسي اعمل زي البوم خاص بحاجة معينة .. او مشاهد من أفلام او مسلسلات مؤثره وهكذا ..

= بعون الله انا مش عامل سقف لطموحي .. ونفسي جدا أتشهر واشتغل وهكون مبسوط جدا اني باشتغل حاجة بأحبها وباعمل حاجة بتبقي هدايا وبتسبب فرحه للناس .. ويبقي لي مشروع خاص بي في الموضوع ده ودايماً باطور فيه .. واهم أحلامي اني اصل لدرجة شهرة كبيرة في تقديم محتوي الناس بتحبه .. حتي لو مش هتشتري مني حاجة او هيطلبوا اوردرات كتير بس مستمتعين بشغلي .. 

= أسلوبي حالياً في الرسم انا شغال رسم Scribbling .. عبارة عن شخبطة عشوائية .. وقادر أوضح بالشخبطة الإضاءة والملامح .. نوع مش مستخدم في مصر كتير .. وهو ده التميز اللي كنت باقول عليه ..

= أهم الرسومات بالنسبة لي الرسمة اللي بيبقي فيها تفاصيل بتحلي الرسمة جدا .. بأحب جدا ارسم صور للأشخاص الكبار سننا ..

= انا مؤمن بمقولة ان اي حد يقدر يوصل بعون الله .. طالما بيجتهد وماشي صح .. وان شاء الله أكون عند حسن ظن كل الناس.. واقدر ابهرهم بأعمال جميلة ..

= طبعا حابب جداً اشكر كل الناس اللي وقفت جنبي وشجعتني وساندتني .. الناس اللي لما كنت باغيب كانوا بيسألوا عليا وايه اللي مانعني من اني ارسم .. واني اكسب ناس تشجعني وتحبني ده اكتر حاجة حركتني للموهبة ..