نجوم الفن يدعمون طلاب الثانوية العامة في مصر قبل الإمتحانات منهم احمد حلمى

كتب-أمجد زاهر

حرص عدد من الفنانين مع اول أيام مارثون إمتحانات الثانوية العامةبمصر،على مساندة الطلاب قبل الإمتحانات،وذلك بعد عدة تأجيلات بسبب فيروس كورونا المنتشر في جميع أنحاء العالم، وتخفيفاً عن رهبة الطلاب منهم أحمد حلمي الذي شارك بفيديو على الإنستقرام يحكي به قصته مع إمتحانات الثانوية العامة وقصة رسوبه 3 مرات بسبب الخوف والرهبة ناصحاً الجميع بعدم الخوف.

رامز جلال واحمد زاهر

أما رامز جلال، فوجه رسالة كوميدية إلى الطلاب  الخريجين على وتيرة مقدمة برنامجه السنوي الذي يقدمه في رمضان.

وعلى طريقة كوميكسات الأعمال الفنية كانت رسالة أحمد زاهر التي بدأها بجملة محمد صبحي الشهيرة في مسلسل يوميات ونيس “أبنائي أعزائي فلذات أكبادي…” وأكمل حديثه على طريقة عبلة كامل بفيلم اللمبي ونصحهم بإرتداء الكمامات وإستعمال المعقمات.

احمد حلمى 

وكتب حلمى على منشور الفيديو: «حبايبي طلاب الثانوية العامة بنين وبنات.. ربنا معاكوا ويوفقكوا وينجحكوا، وخدوا بالكوا طبعا ومحدش يقلع الكمامة وبلاش تجمعات، مش عايزين ننجح في الثانوية العامة ونسقط في الكورونا»، مضيفاً: «سهيله بنت اختي.. شدي حيلك وربنا يوفقك يارب».

وقال حلمى: «الفيديو ده مخصوص لطلبة وطالبات الثانوية العامة، بخصوص إن الامتحان بكره، وبما أننا بنتكلم على الثانوية العامة، فأعتقد ان مفيش حد أحسن منى أبداً يتكلم عن الثانوية العامة، لأنى خبرة وسقطت فيها 3 سنين».

وتابع: «حقيقة عاوز أقولكم أنا كنت بسقط في الثانوية العامة، لأنى كنت ببقى خايف من الامتحانات، السنة الوحيدة اللي مخوفتش فيها من الامتحان سقطت برضه، بس سقط عشان اكتشفت إنى كنت خايف وعامل نفسي مش خايف».

وأضاف: «السنة الوحيدة اللى نجحت فيها هي اللى مكنتش خايف من الامتحان بجد، وكنت بتعامل معاه على أنه (فسفوسة) إيه يعنى امتحان الثانوية العامة، هيعمل فيّ إيه هيموتنى، ما أنا حلو وجميل، وبصحتى وزى الفل، هيحدد مستقبلي، مايحدده، انا هذاكر واعمل اللى عليّا».

ومضى قائلاً: «أنا هاروح وأحل، هنام كويس واصحى أكل أي لقمة، وأروح الامتحان صافي، ومش هخاف، ومش هضيع وقت في إنى خايف».

واستطرد قائلا: “متضعش وقتك في الرعب والخوف، ووجع البطن، امتحان الثانوية العامة(فسفوسة)، متاخدش بالك منها».

واختتم حلمى قائلاً: «هتحلوا الامتحان لما تركزوا على انكم مش خايفين، وتركزوا إن دماغنا فيها معلومات مش هتتمسح، متضيعش وقتك، متضيعش الشوية اللى في الأول دوول في الرعب والخوف، هتحلوا الامتحان وهتبقوا جامدين، هتجيبوا مجموع، وهتدخلوا أحسن كليات، اللى انتم نفسكم فيها».