“دولاب حياتي يا عين” كتبتها دعاء خطاب

“دولاب حياتي ياعين”

كتبتها / دعاء خطاب

من كام سنه أخدت قرار إنى أعيد

ترتيب” دولاب حياتى من جوه ”  أغير طريقه تفكيري وتعاملى مع الدنيا كلها… الأشياء والناس والعلاقات التى لا أملك تغييرها..أغير نظرتى انا ليها وطريقه تعاملى معاها ..أبعد عن كل شئ بيخلص على طاقتي أصدقاء..قعدات..إجتماعات..علاقات  أغانى وبرامج مليانه نكد و سلبيات أى كلام غم وحزن.. أي حوارات حتسحب من رصيد طاقتي.. أبعد اد ما اقدر عن كل شئ بيتغذي على سلامي النفسي.. اقنن علاقتى بالناس اللى ضرورى تفضل فى حياتى تحت مسميات مختلفه..اعمل الواجب واللى يُمليه عليا ضميرى وأد ما اقدر اكون مفيده بدون ما اعرض نفسى لضغوط زياده ومش حتفيدهم بحاجه.

بقيت بعرف اقول لأ وبقدر اتمسك باللى يريحنى انا.. ومش على حساب حد.. وده حقيقى فرق كتير معايا بقيت بسيطر أسرع على اكتئابى ومزاجى…وأصبحت أفضل حالا فى التعامل مع مشاكل وضغوط حياتي.

بسعى لمعرفه الناس المتصالحين مع
نفسهم المليانين طاقه ايجابيه
محبى الناس والحياه المليانين ثقه
وفرحه…اللي ممكن اتعلم منهم حاجه
اللي يضيفوا.. مش ياخدوا مني
اللى بيعرفوا يستمتعوا بالحياه بجد
الأصدقاء اللى بحقيقى…اللى يلاحظوا غيابي وتغير حالتي ومزاجي وبيعرفوني من نبره صوتي ويفضلوا ورايا لحد ما يشدوني لفوق من تانى.. بمكالمه..برساله.. بسؤال بوجودهم.. بتوصيتهم ليا اهتم بنومي وأكلي.. بإهتمامهم الصادق اللي بيترجم لحاجات مهمه انا محتاجاها.. بمحاولاتهم رسم إبتسامه على وشي بأي طريقه بدعائهم الصادق من القلب واللي
حقيقي بيوصلني اثره وبشعر بيه.

بشكر ربنا على سنوات النضج
اللى وصلت لها أخيرا واللى عرفتنى
أقيم وأقدر الناس اللى حواليا بشكل
صحيح علشان أُبقى على اللى حقيقى يستاهل وله قدر وقيمه عندى…واُفرغ حياتى من كراكيبها وأبعد عن كل ما دون ذلك من علاقات سامه.. بعد ما إستفدت واخدت دروس وعبر وعرفت الحكمه من وجود السيئين في حياتنا.